فيلبس يحبب طفلا مصريا يعيش بإيطاليا في وطنه: فهمته تاريخنا
فيلبس يحبب طفلا مصريا يعيش بإيطاليا في وطنه: فهمته تاريخنا
بين جدران أحد الفصول بمدرسة بالعاصمة الإيطالية روما، بدأ الشاب المصري "فيلبس" صاحب الـ22 عامًا، في سرد بعض من روايات وأسرار الحضارة المصرية القديمة، لمجموعة من الطلاب الإيطاليين بينهم طفل مصري من ذوي الهمم، تسببت تلك القصص في تغيير مفهومه ونظرته السلبية عن بلاده، ليشعر بالفخر الشديد بين زملائه، لما تحمله دولته من سجل تاريخي عظيم يبهر العالم بأكمله.
"لما جيت إيطاليا، كملت شغلي اللي كنت بشتغله في مصر وهو التدريس والترجمة الفورية، أنا بدرّس إيطالي على النت، وبشتغل مترجم عربي في إيطاليا، وفي الصيف بشتغل جرسون في مطعم لأني منفصل ماديًا عن أهلي".. وفقًا لـ "فيلبس" طالب قسم المصريات بجامعة بيزا الإيطالية.
المعلمة الخاصة بالطفل المصري صاحب الـ13 عامًا، استدعت الشاب فيلبس، لمساعدة الطفل بالحديث عن تاريخ مصر والحضارة الفرعونية، كي يساعده في تغيير الصورة الذهنية السيئة التي ترسخت بداخله عن بلاده، "المدرسة بتاعت الطفل كانت عايشة في مصر وكانت تعرفني قبل ما ترجع إيطاليا، وبعدين قالتلي إن فيه طفل مصري عندها في الفصل مولود هنا، ومش قادر ينسجم مع الفصل بتاعه، وميعرفش حاجة عن مصر خالص، وطلبت مني أعمل معاه مكالمة فيديو عشان أجاوبه على كل أسئلته عن مصر هو وزمايله في الفصل".
بصورة سريعة انسجم الطلاب وخاصة الطفل المصري، مع فيلبس، وبدأوا في إلقاء الأسئلة عليه خلال مكالمة الفيديو التي أجراها معهم، إذ تعددت استفساراتهم عن مصر وتاريخها الحضاري وغيرها من المعلومات الأخرى.
"عملت المكالمة عشان أجاوب الطفل وأصحابه عن أسئلتهم عن مصر، وكان الهدف إني أعرفه كل حاجة عن بلده، وبدأت أكلمه شوية عن الحضارة المصرية وإنها أعظم حضارة في التاريخ، وعلم المصريات، وإننا أصحاب أول جيش في العالم ومعلومات تانية كتيرة، وبعد ما حكيت له كل ده، رد فعله كان مبهر جدًا لأنه حس بالفخر ناحية دولته".. حسب قول الشاب العشريني.
