وجــــــع الحنيـــــن
ولو أنه قادر يرسم في عز الفرح دموع هو نفسه اللي قادر يرسم وسط الحزن حكة مجلجلة !! شايل قلبه علي كفه مبيمنعوش عن حد وإن جاله حبيبه في وقت لساه هيلاقيه منتظر , أصله مستني سنين وسنين ورغم تعبه من وجع الحنين لسه برده مستنيها , هو اللي صوته هتف في يوم وحن ورق ألف يوم .. قلبه بيحركه مش قادر يعرف لفين وبرغم كل حاجة لسه مبسوط وقادر يتبسط أكتر وأكتر برغم الألم لسه جواه ما هو يعني أصل الألم جزء من الحياه وتمشي الدنيا إزاي لو إنت مبسوط دايماً ..؟!
أوقات الملل يدخل حياته ويقضيها خبط .. خبط يحاول ينسي ويعدي ما هي لازم تستمر .
يا للعجب عليك يا أبو الوش الأسمر وشعرك المجعد , لساك قادر تصبر وتعدي وتكبر يومك الحقيقي جي إمتي ؟ إمتي تتفتح شبابيك النور تملا الدنيا ضي .... وأه وأه من لوعة غياب الضي .
كلمني أكتر عن أيامك ؟ حبيبتك ؟ أهلك ؟ طب صحابك ؟
لسه نوع سجايرك زي ما هو ؟ فلسفتك في شرب القهوة الساده إللي شايف مرارتها متعه تخليك حاسسها في الحلق .... جايز الصوت مكتوم في الحلق وإيه وفين النهاية يا صديق ؟ طب قادر لسه تضحك وتشوف التنكيت في حالات توجع القلب والعقل , قلبك ياما إتوجع وإنت ولا فارق ما هو أصل معدش شيء فارق , قول ما تقولش .... تعمل ما تعملش كله محصل بعضه ياما قولت دي الجملة وبعدها إبتسامتك البشوشة .
ياما كان نفسي تقدر تجاوبني قبل ما تتلف بالقماش البفته , رايح لناسك ولدنيتك اللي بجد بتبصلنا ما أهو أصل إحنا العبط ... اللي ماسكين في اللي ما يسواش وإنت وحدك اللي فزت علشان إنت تستاهلها ..... يا أبو العيون السود والبشرة السمرا
لسه الوجع في القلب
لسه بندور علي حضن وضمه ......!!