تمثال لـ«السيسى» فى الجمالية بتكلفة 6 آلاف جنيه.. رمضان كريم

فى شارع «المعز» يقف مدفع رمضان يجاور الفانوس النحاسى الضخم يطلان على تمثال بالحجم الطبيعى لسيدة الغناء العربى أم كلثوم، وآخر لمحمد عبدالوهاب، روح مختلفة ورمضان مختلف عن أى مكان آخر فى مصر وبالأخص عندما يكون السؤال عن التمثال الجديد الذى احتل موقعه على مقهى اللورد الشهير «هو ده تمثال الريس». «تمثال السيسى» الوافد الجديد على شارع «المعز»، استقبل زائرى منطقة الحسين والقاهرة الفاطمية خلال شهر رمضان المعظم، تمثال من الجبس بالحجم الطبيعى وضع إلى جوار مدفع رمضان، اعتبره صاحب مقهى اللورد هدية للسيسى فى أول شهور تنصيبه رئيسا للجمهورية: «ده أول رمضان بييجى وهو رئيس ويستاهل إننا نحتفل معاه برمضان مختلف»، قالها «اللورد» مشيراً إلى أن صانع التمثال هو أحد أصدقائه الذى دائما ما يصنع له تماثيل الفنانين ليضيف شكلاً جمالياً للمقهى الشهير فى شهر رمضان: «السنة دى رمضان مش بالفنانين رمضان بالسيسى». تكلفة التمثال تراوحت بين 5 و6 آلاف بحسب «فرج»: «مفيش حاجة تغلى على ابن حتتنا إحنا نفديه بولادنا مش بفلوسنا بس»، الحاج فرج اللورد، أكد أنه من أوائل من تبرعوا لصالح صندوق دعم مصر الذى دشنه السيسى: «الراجل ده إحنا وقفنا وراه لحد ما نجح وهنفضل وراه فى كل حاجة هيعملها ومستعدين نستحمل لآخر مدى عشان خاطره». التمثال الذى جدد فرحة أهالى الجمالية بفوز «ابن حتتهم» بكرسى الرئاسة أصبح معلما سياحيا جديدا انضم لطابور المعالم السياحية فى المنطقة الأثرية، قرر الحاج فرج أن يستمر طوال العام لتشجيع السياحة وليس لرمضان فقط: «الناس بتيجى تتصور جنبه وحتى السياح بيسألوا عليه من أول ما يدخلوا شارع المعز».