ممثل بـ«بودي جارد» للمنتقدين: انتقد بس بأدب.. ونجاح المسرحية استمر 11 عاما
الفنان شريف إدريس
سرد الفنان شريف إدريس، بعض الذكريات المتعلقة بمسرحية «بودي جارد» التي تعرض حاليًا على إحدى المنصات الإلكترونية بعد 11 عامًا من تقديمها على خشبة المسرح، باعتباره أحد المشاركين فيها، فضلًا عن مواجهة انتقادات البعض للمسرحية بزعم أنها لم ترق لتوقعاتهم.
بدأ عرضها عام 1999 واستمرت حتى 2010
وحكى شريف إدريس، عبر حسابه على موقع التواصل الاجتماعي «فيس بوك» قائلًا: «أنا كممثل في عرض مسرحية (بودي جارد) وليا الشرف الكبير إني اشتغلت مع الزعيم، مش من حقي أرد على أي انتقادات اتوجهت للمسرحية».
واستطرد «حضرتك كمتفرج عجبتك المسرحية أو ماعجبتكش ده حقك الشرعي تمامًا ونقدك على راسي، لكن الناس اللي بتتطاول بشكل قليل الأدب لازم أقولهم كلمتين مهمين، أولاً مش أنا اللي هتكلم عن عادل إمام وتاريخ عادل إمام، ثانيًا أنا اشتغلت في المسرحية دي في يناير 2006 لحد ماقفلت في نهاية 2010، وكنا بنعرض صيف وشتا».
وتابع: «سافرت مع المسرحية أكتر من بلد عربي، وكنت بتخض من حجم الحضور لمسرحية مستمرة لمدة 11 سنة، أيوة بتخض ده كان فيه جمهور حفظتهم من كتر ما بيحضروا المسرحية، وفي السفريات كنت بتخض من استقبال الزعيم في أي بلد بنروحها، وحجم الجمهور اللي بيحضر في أي بلد».
الانتقاد بأدب
واستكمل شريف إدريس كلامه بقوله «وأقول لحضراتكم على حاجة مهمة كان فيه ناس بتيجي تتفرج مرة واتنين وتلاتة علشان بس يشوفو عادل إمام، المسرحية دي نجحت بكل مقاييس النجاح في وقت عرضها، ومع اختلاف الزمن يمكن ماتعجبش حضرتك بس للأسف اسمحلي أقولك إن حضرتك مش مقياس للنجاح والفشل مع احترامي الشديد، بدليل إنها أغلى مسرحية اتباعت في تاريخ المسرح».
وتابع: «نجاح المسرحية أنا كنت بشوفه كل ليلة بعيني، نجاحها اللي أهم من الفلوس نجاحها الحقيقي في الجمهور اللي حضرها لمدة 11 سنة متواصلة وحُب الناس لـ عادل إمام وتاريخه اللي مافيش حد قدر يوصل لربعه ولا حد هيوصل، من الأخر انتقد براحتك بس بأدب ونقدك على راسي».
مسرحية «بودي جارد» بدأ عرضها عام 1999 واستمرت حتى عام 2010، تأليف يوسف معاطي، إخراج رامي إمام، وتوافد عليها عدد من النجوم منهم رغدة، وشيرين سيف النصر، وعزت أبوعوف، ومحمد أبوداود الذي حل بديلًا للفنان مصطفى متولي زوج شقيقة عادل إمام الذي وافته المنية خلال توقيت عرض المسرحية.