سكان «أحمد كامل» ينعون زمن الراحة
موقف للميكروباصات وسوق عشوائية.. هكذا أصبح حال شارع «أحمد كامل» فى الجيزة، يشتكى معظم سكانه من كثرة الجرائم التى تحدث به من التثبيت وسرقة الممتلكات الخاصة من قبل اللصوص والبلطجية، بخلاف أنه أصبح مرتعاً للباعة الجائلين ويضر محلات الطعام والمحلات المجاورة.
«حرامية كانوا راكبين موتوسيكل سرقوا شنطتى وجريوا بسرعة من بين الحواجز ومحدش عرف يقبض عليهم رغم أن قسم الطالبية بينه وبين الشارع 500 متر» قالتها آية محروس الفتاة العشرينية التى تعرضت للسرقة عدة مرات وذهبت لتحرير محضر ولم تحصل على المسروقات حتى الآن، حسب قولها، مشيرة إلى أن الشارع أصبح البلطجية وتجار المخدرات يقفون فيه ليلاً لبيع المخدرات «أنا بخاف أتأخر بره البيت أحسن حد يثبتنى أو يخطفنى».
تضرر أيضاً أصحاب المحلات بشارع أحمد كامل ويقول «داود وليم» صاحب محل لبيع وتصليح الكاوتش، «مش عارفين نشتغل بعد ما المحافظ خد قرار يقفل الشارع عشان دلوقتى اتوقف حالنا، الأول كانت العربيات بتدخل ونسترزق بتصليح كاوتش أو بيع لكن الحواجز قفلت باب الرزق»، يؤكد «داود» أن الشارع أصبح مكاناً يؤوى الباعة الجائلين وبالليل بينقلب سوق عشوائى بعد ما كان شارع رئيسى ويمر به الناس ليل نهار وأمان بقى دلوقتى خطر على اللى ساكنين فيه». بينما يرى محمد عبدالعليم، أحد سكان شارع أحمد كامل، أنه يواجه صعوبة فى الذهاب والعودة من وإلى عمله «بعد قرار المحافظ بقفل الشارع وقفل التحويلة المرورية بشارع فيصل كان الشارع منفذ لتخفيف الحمل عن شارع فيصل إلى شارع الهرم إنما دلوقتى بعد ما قفلوا الشارع وقفلوا الفتحة الدنيا ازدحمت جداً»