شعر| كابوس "مستشفى حكومي"

شوفت كابوس الليلة ف نومي إنيّ مريض مستشفى حكومي جنبي صفيحة وفيها زبالة وفار كان لابد تحت هدومي وجاني تمرجي معاه سمّاعة بيكلمني الكلمة ف ساعة لف ودوّر ع الولاعة ودخـّن يامه وسوّد يومي ----- بحلق فيّه بعينه القايدة وقال لي علاجك مالهوش فايدة وأنا مستعجل يعني مروّح رنْ عليّه إن عوزت مساعدة قلتله نفسي ولوْ برشامه أصل الضغط بيهبط يامه ولمّا الصبح تعود بسلامه تجيني عشان تعمليّ الزايده ,,,,, قل لي الزايدة تعوز تحويل بكرة تروح مستشفى النيل تدفع قبل ما حد يشوفك بس علاجهم كله بديل ولوْ تستنىّ نشوف دكتور يمكن تقعد ست شهور يا تموت قبل ما ييحي الدور يا اعملهالك آخر الليل ,,,,, قوم هات مشرط يا الله وخيط ديّر وشـّك يم الحيط وأبلع ريقك وأنفخ بطنك بعد ما تاخد شربة زيت وارفع أيدك لم الكرشة لا أنا جزار ولا ح افتح ورشة أوعة الدم يسيل ع الفرشة وابقى ادعيلي إن روحت البيت ,,,,,, فاجأة لقيتني صحيت من نومي وأنا زهقان وباشق هدومي ونازل ضرب يا ناس في مراتي بأقول لها إصحي ياستيّ وقومي لميّ عزالك صحيّ عيالك قومي بسرعة ورحمة خالك إوعي أمّا اتعب ييجي ف بالك إنيّ أروح مستشفى حكومي