«دينا»: لو ماشاركناش يبقى بنعاقب نفسنا
«دينا»: لو ماشاركناش يبقى بنعاقب نفسنا
دينا
دراستها للقانون جعلتها صاحبة خبرة ومعرفة فى التفرقة بين المرشح الجيد وغير الجيد، فقررت «دينا ناصر» خريجة كلية الحقوق، أن تساعد زميلاتها فى اختيار المرشحين: «الانتخابات المرة دى مهمة لأنها جاية بعد مشاكل كتيرة مرت البلد بيها، الانتخابات دى ببساطة عاملة زى عملية جراحية بنّضف بيها البلد ونعتبرها زى نقطة بداية لينا كلنا».
عملية اختيار «دينا» للمرشحين لم تتم بشكل عشوائى، بل تمت بعد دراسة وافية قامت بها: «جئت ببرامج معظم المرشحين وبدأت أقرأها واحد واحد، وبعدها عملت مقارنة بين المرشحين من حيث الأفضل واللى هيقدم شىء كويس للبلد والمنطقة اللى أنا فيها».
تبتسم «دينا» وهى تؤكد أن عملية المقارنة التى قامت بها جعلتها تكتشف خبايا بعض عملية الانتخابات، لدرجة أنها حذرت زملاءها وأصدقاءها: «فيه حاجات محدش بياخد باله منها زى إن فى مرشحين كل هدفهم الشهرة مفيش عندهم أى برنامج انتخابى حقيقى، وفى طبعا رشاوى بشكل كبير جداً».
مقاطعة الشباب للانتخابات بسبب الرشاوى والتزوير ليست حلاً كما تقول «دينا»: «اتكلمت مع شباب كتير، حاولت أفهمهم إن ده خطأ كبير منهم، ما إحنا لو قاطعنا بسبب التزوير اللى حصل فى انتخابات سابقة يبقى إحنا بنعاقب نفسنا كشباب إننا نبدأ من جديد، لأ وكمان بندى الفرصة للى بيوزعوا رشاوى إنهم هما اللى يفوزوا على حسابنا».