قصقصت ريشك
وانت كان حلمك تطير
و كشفْت سِرَّك
وانت سرك كان ف بير
مش كل طير بجناحُه طار
هيلاقي في الآخر مطار
قبل أما كان ياخُد قرار
كان برضه لازم يستخير
تفرق كتير
...
وزّعت أكوام الورق
وانت الأخير حسب الأصول
كل الفيشات اتأخّرت
ومفيش وصول
اصبُر كده يمكن تنول
من دول و دول حظ القُمار
العب على الليل
والدفا
العب على النور والمسار
...
يا للأسف
طِلع النهار
حتى الچاكتّة اللي بتستُر جِتتك
بدّلتها بكاسين في بار
و قرار أخير
...
إِنَّك في أي طابور رحيل
تبقى الأخير