ضيعنا العمر في تجديفنا
ف هِلكنا.. وعامت قواربنا
وفشلنا نلاقي وصول واضح
ف بقينا نقدس تجاربنا
حتى أمَّا رضينا.. وسَلمنا
طواحين الهوا جَت تحاربنا
وده عيبنا؟
لو كنت بتسأل
ف بنشهد طبعا
أه ده عيبنا
بس إحنا ضربنا... وقَسمنا
وعشمنا هزمنا... وأذانا
دلوقتي رضينا.. بـ فُرجتنا
حاجزين أماكنَّا... وحجزانا
كل أما بنحفر.. وبنهرب
نلقانا في نفس الزنزانة
وحَزانى؟
لو كنت بتسأل
ف بنشهد طبعا
أه حَزانى
والحزن يا سِيدنا... مِحَيّدنا
ومِتَقّل روحنا.. ورجلينا
مش شايفين أول ولا آخر
بنلف في محور حوالينا
"ما علينا" ده أصبح مبدأنا
وإذا كان مش مبدأ.. ما علينا
مَلّينا؟
لو كنت بتسأل
ف بنشهد طبعا
مَلّينا