بشيل الصبح شنطة ضهر..
وأشيل فوق وشي تكشيرته..
عشان الزحمة يوم الحد..
طابور المدرسة بينصح..
عدم تأجيل حاجات اليوم لحد الغد..
حيطان المدرسة باهته في غياب داليا..
كتاب تاريخ بيتغير..
عشان المرحلة التالية..
كتاب الكيميا بيوضح..
بإن عقولنا لو شمّت هوا شوية..
هتتأكسد..
فلازم يتمنع عنها الهوا ولازم..
نقلل أكسجين الجو..
كتاب الكيميا قال بالنص..
"وتحفظ في مكان مظلم"..
وتحتيها بنفرش رمل..
ونفرش كربونات صوديوم..
كتاب جغرافيا بيحدد..
دواير العرض.. خطوط الطول..
سقوط أمطار.. مناخ قاري..
جبال وسهول..
ويتكلم عن الناس اللي ساكنة فـ آخر الكوكب..
وعن زيادة التعداد..
عشان في رعاية صحية..
لكنه عمره ما بيوصف برودة الجو..
ومين مش لاقي سقف فوقيه..
ومين مش لاقي وقت الليل..
سرير ولحاف..
وعمره برضه ما اتكلم..
عن الست اللي بتعاني..
يوماتي عشان تلاقي الشاي..
وعيشها الحاف..
وفين دفا الوطن والأرض؟..
وإقليمنا المداري الجاف؟..
كتاب جغرافيا بيحدد..
عدد إنتاج بلدنا من الجاموس والقمح..
لكنه عمره ما يناقش..
عدد إنتاج بلدنا من البقر.. في اليوم