صفحات جرايد مليانين..
أسامينا وأسامي الصحاب..
ووشوشنا وإحنا مرهقين..
فيها اللي عاش..
فيها اللي غاب..
فيها اللي ماسك قبضته..
فيها اللي ساب..
فيها اللي قرر يختفي..
عشان خلاص مبقاش يفيد..
فيها اللي قرر يكتفي..
بنظرة خايفة من بعيد..
والقلب بعد ما ينطفي..
مش مستحيل يرجع يقيد..
والتعليقات تحت الصور..
في كل مرة بتختلف..
وفي كل ساعة بيتولد..
تعليق جديد..
تمدح ساعات..
تلعن كتير في سيرتي ولآخر جدودي..
رغم إن بتمجّد بطولتي..
برضه بتلومني لجحودي..
وكتير بتتوقعلي مستقبل سعيد..
وساعات تزين نفسها..
بجملة زي "دعم الشباب"..
أو "خلق جيل قوّاد جديد"..
لكن كتير..
بتقول عليا مندفع..
خبراتي صفر..
عيّل يادوبك كام سنة..
النشرة بتقول إن انا..
ناقص رباية واحترام..
بتحط مواعيد الصلا..
وبيان بأسعار الخضار..
وإن الدولار بيعلى قدام الجنيه..
وإن الشباب المندفع..
لو بس يصبر حبتين..
الدنيا مش هتروح عليه..
الراديو بيقول المطر..
هيغطي كل القاهرة..
يمكن يومين..
يمكن يزيد..
فـ البيت مكان آمن أكيد..
نظرا لإن الجو برد..
خدوا احتياطات الخروج..
وياريت بلاش تتأخروا..
في الراديو ناس بيحذّروا..
من غيمة الرؤية عشان كتر الضباب
شبّورة هتغطي الطريق..
فخلّوا بالكم مـ اللي جيّ..
وبخرّج النفس الأخير..
والراديو بيقول إني حيّ