بقالك قد إيه ملهي..
بقالك قد إيه مشغول..
بقالك قد إيه ناسي
تقفف عريان قصاد نفسك..
مجربتش تشوف عن قرب من فترة
تشوف روحك بدون ستُرة..
وتنفض كل ورق التوت..
وتتفاجئ بتفاصيلك..
حاجات في الصورة باينة لك
زمان مكنتش موجودة..
وإمتى وفين بقيت فجأة..
عجوز أيامه معدودة..
بيزحف ناحية المرسى..
وعايز مـ الحياة فرصة..
يصارع فيها ويقاتل..
يحس بنشوة المكسب..
تطبطب إيد على كتافه إذا يخسر..
يلاقي الحضن لو يكسب..
يرتب قايمة الأحلام عشان يحسب..
يحدد للحاجات توقيت..
عشان العمر متسرسب..
ويتمنى الحياة تسمح له بمغامرة..
يبطل يمشي جنب الحيط..
يسيب الهامش الفاضي..
ويفرد جسمه في الصفحة..
يكون فاعل.. يكون مفعول..
يكون جارح.. يبات مقتول..
يبطّل يبقى من ضمن الشهود وخلاص..
يكون طيّب.. يكون شرير..
يعيش الدنيا زي الناس..
وياخد كفّ مـ الدنيا فـ يتألّم..
يرد الكف ضرب الإيد..
مايبقاش في الحياة موظف..
بيمشي بجدول المواعيد..
يخاف يتجازى لو يخطأ..
وآلة كبيرة بزراير..
مابتحسش.. ولا بتفرق..
بقالك قد إيه ناسي..
تشوف نفسك بدون تجميل..
تكون عريان.. قصاد قلبك..
تواعد بنت فتجيلك..
تشاركك كل أوقاتها..
وتحكيلك..
وتضحكلك..
تغنيلك..
وتنفض كل ورق التوت..
تشوف نفسك بدون إضافات..
وتتفاجئ بتفاصيلك..