كبدة وسجق بالفرنساوي يعني Foie et saucisse عشان لما تروح لـ"ريم" في المطعم بتاعها “ريموشا”، تبقي عارف تطلب الأكل اللي انت عايزه بس لو قولتلها كبدة وسجق عادي هتأكلك برضو. ريم خريجة آداب فرنساوي، واشتغلت حاجات كتير، مُدرسة وموديل وسيلز في شركات وسكرتارية، بس مالقتش نفسها في كل ده وكان نفسها من زمان تعمل مشروع ليه علاقة بالأكل. قالت ريم إن الفكرة جاتلها من الأفلام الأجنبي، لما شافت إن عربيات الأكل بيبقى شكلها نضيف ومشاريع مربحة، فقررت تغير مفهوم عربية الكبدة في مصر، ابتدت تجيب كراسي وتعمل قعدات للزباين، لكنها واجهت مشكلة بسبب التصاريح وعشان كده قررت تأجر محل بس تحافظ على شكل عربية الكبدة. الستات مهما حاولوا يداروا إنهم بيزهقوا من الطبخ، بس برضو فيهم اللي بيبقى مجنون بيه، ريم رغم دراستها وكل الشغل اللي اشتغلته إلا إنها خدت كورسات في الطبخ وحصلت على شهادة انترناشيونال وده ساعدها في إنها تعمل مشروعها الخاص. أي حد بيعمل مشروع بيكون خايف في الأول من الفشل، ريم اتفاجأت من ردود أفعال الناس اللي حسسوها إنها جريئة وبتعمل حاجة مختلفة، وده اللي شجعها إنها تكمل ونفسها يكون عندها أسطول عربيات كبدة.