ديكور إحدى حفلات الخطوبة فى المنزل
الكراسى رُصت بعناية فائقة فى مساحة محدودة، تقابلها كنبة صغيرة، تكفى فردين فقط، تزينت بالورود والبالونات الملونة، هكذا تُجهز الصالات لاستقبال عدد بسيط من أهالى العروسين، فى حفلات الخطوبة التى تُقام فى المنازل كبديل موفر عن قاعات المناسبات والفنادق، التى ارتفعت أسعارها بشكل مبالغ فيه، وذلك من خلال الاستعانة بمنظمين لحفلات الخطوبة.
يُفضّل أغلب المقبلين على الزواج، عقد حفل خطبتهم فى المنزل توفيراً للنفقات، وتتراوح أسعار تجهيز المنزل للخطوبة ما بين 400 و500 جنيه للكوشة البالون، بينما تصل أسعار الكوشة الورد إلى 800 جنيه: «بنعمل شوية حركات كمان مابتكونش موجودة فى القاعة زى أسامى العروسين، وخاتم الخطوبة على شكل بالونة، وبنخرج مع الأوردر برواز للخطوبة يتصوروا فيه».. حسب مصطفى عبدالله، أحد مسئولى التخطيط لحفلات الخطوبة.
«ليلة الخطوبة فى البيت 500 جنيه تزينها زيها زى القاعة، و500 جنيه تانيين جاتوه، والليلة هتخلص أحسن من بره».. بهذه الكلمات يبرر «مصطفى» إقبال معظم العرسان على الخطوبة فى المنزل، كما أن هناك من يفضل عمل الخطوبة فى مساحات محدودة داخل المنزل، لاستقبال عدد بسيط من المعازيم.
«عندنا عروض للخطوبة من أول 250 لحد 500 جنيه.. وكله بيبقى شكله شيك وحلو».. حسب سمر التهامى، المسئول عن تنظيم حفلات الخطوبة بالمنازل، ويتوقف تجهيز المنزل على استخدام البالونات فقط: «عرض الـ250 ده بيكون 2 استاند كبير و20 بالونة فى السقف، و2 بالونة للهيليوم»، وتختلف العروض الأخرى، حيث يزيد السعر كلما زاد عدد البالونات وكتابة الأسماء بورق الفوم الملون، كما تقوم بالتخطيط لحفلات الخطوبة المحدودة فى أماكن كـ«الكافيهات، حدائق الأوبن آير»، فهناك من يلجأ إلى إجراء الخطوبة خارج المنزل نظراً لمساحته الضيقة: «فيه ناس كمان مابتحبش تبهدل بيوتها وعايزة توفر، فبتعمله فى كافيه على الضيق».
تستغل «سمر» وفريق عملها مساحات البيوت، لتجهيزها حتى تبدو كقاعة أفراح صغيرة: «بنحاول نظبط البلالين مع شوية فوم، مع شكل الصالون أو الصالة وبنفضّى المساحة خالص ونسيب الكنبة للعرسان»، إلى جانب أسلاك من النور الملونة، التى تعطى منظراً مبهجاً.
«خطوبتى كلها ماكلفتنيش أكتر من 1500 جنيه، علمت البلالين بـ500 وأكل المعازيم اللى جات، وكان البيت منظم أحسن من بره».. بهذه الطريقة استطاعت مايا أحمد، أن توفر كثيراً، بدلاً من تنظيم حفل الخطوبة فى إحدى القاعات المكلفة: «قبل خطوبتى كنت بالف على قاعات كتير، أقل قاعة وماتشيلش أكتر من 100 فرد كانت بـ15 ألف جنيه».
تعليقات الفيسبوك