مصيف رمضاني
على مدار عدة سنوات يهل علينا شهر رمضان الكريم بالتزامن مع فصل الصيف، طقس شديد الحرارة، وفترة صيام تستمر لساعات طويلة، لا يهوّنها سوى نسمات البحر، حيث يتشجع البعض للذهاب إلى المصيف رغم الصيام، وشركات السياحة الداخلية تقدم عروضاً خاصة فى هذا الموسم لتشجيع الناس على قضاء وقت ممتع فى الهدوء بعيداً عن الزحام.
ناهد عزيز تنتظر شهر رمضان خصيصاً لعمل برنامج سياحى مع أولادها: «المصيف بالنسبة ليا أنا وولادى بقاله كام موسم يعنى رمضان، بتكون البلد فاضية والدنيا هادية ومفيش غيرنا إحنا وناس قليلة جداً اللى بنطلع فى التوقيت ده، بنحس الشط كله ملكنا»، انخفاض الأسعار خلال الشهر جعله حلاً محبباً لديها: «بحجز الشقة فى الأسبوع ده متعديش الـ600 جنيه، وبتكون الشقق نضيفة لسه ماتبهدلتش من المصيفين اللى قبلنا»، وما يجذبها إلى المصيف الرمضانى أيضاً هو أن المطاعم أغلبها يتميز بالهدوء التام.
تصف «ناهد» فترة المصيف بأفضل 7 أيام: «ده أكتر أسبوع بنستجم فيه كلنا وبننسى زحمة القاهرة والمشاكل كلها ونقعد نفصل حتى لو هنبقى فى المصيف كله لوحدنا، بس ده أروق وأحسن لنا وكمان أرخص»، وتفضّل أول 15 يوماً من الشهر الكريم لرحلتها الموسمية: «دول بيبقوا أحسن وقت عشان أقدر أرجع وأستعد للعيد والعشرة أيام الأخيرة من الشهر بتفرغ تام».
يختار إسلام عماد، 29 عاماً، أن يسافر إلى بعض المناطق الساحلية كمدينة شرم الشيخ، لقضاء عطلته الصيفية فى هدوء وراحة والشعور بالاستجمام الذى يفتقده بشوارع القاهرة: «مفيش أحسن من الراحة والهدوء اللى بيكونوا على الشواطئ أو فى المدينة نفسها وهى فاضية وماشى فيها لوحدى ويا دوب كام حد بس، بنقدر نستمتع جداً بالمصيف»، ومن مميزات المصيف فى رمضان هو الأسعار البسيطة مقارنة بالأيام الأخرى من فصل الصيف.
وعن عروض شركات السياحة الداخلية خلال الشهر، منذ 5 أعوام ماضية ينظم محمد عطالله، مسئول بشركة للسياحة الداخلية، الرحلات خلال رمضان، ويصف موسم «المصيف» خلاله بالهدوء الذى جعل له زبونه الخاص: «الإقبال عليه بيكون متوسط، وزبونه بيكون عاوز يتمتع بالبحر وبكل مكان سياحى بيزوره، وأغلب المصيفين اللى بيحجزوا فى الشهر بيكونوا من الأقباط»، ويتراوح متوسط أسعار الرحلات الأسبوعية خلال الشهر بين 1000 و2000 جنيه: «الرحلة بتكون شاملة المواصلات والوجبات وكل التسهيلات المتاحة».
وبحسب «محمد» فإن الإقبال كبير جداً خلال هذا الموسم، خصوصاً لقضاء المصيف بمدينة مرسى مطروح «لأنها هادية جداً وكمان السنة دى فيها تطويرات كتير، وفيها شارع يُعتبر ممشى هيكون كله شاشات عرض لمباريات كأس العالم».
تعليقات الفيسبوك