«أتيليه» يضم فساتين مختلفة بالمنصورة
تضامناً مع المقبلين على الزواج وأسرهم، بسبب الضغوط والأعباء المادية التى تواجههم، قررت صفاء عماشة، صاحبة «أتيليه» لفساتين الزفاف والسهرة بمدينة المنصورة، تدشين مبادرة «معاً للتخفيف عن أبو وأم العروسة»، بتقديم فساتين الخطوبة أو الزفاف مجاناً للأيتام وغير القادرين وذوى الاحتياجات الخاصة.
«أى واحدة معهاش فلوس وعايزة تجيب فستان فرحها أو خطوبتها تيجى بنفسها تختار أى موديل عاجبها»، بحسب صفاء، التى تعرض فى «الأتيليه» فساتين بأشكال ومقاسات مختلفة، لترضى جميع الشرائح والأذواق، فإحساسها بكَم الضغوطات التى يواجهها الأهالى أثناء تجهيز بناتهم، جعلها تشعر بالمسئولية تجاههم، وتقرر المشاركة فى تجهيزات الزواج.
تستقبل «صفاء» العرائس من 10 صباحاً، وتترك لهن حرية اختيار الفساتين وفقاً لأذواقهن: «كل اللى عاجبها فستان تشاور عليه بس وتدخل تقيسه، ولو هى محتاجة تغير أو تظبّط فيه حاجة عشان تطلع بالشكل اللى نفسها فيه باعمله بنفسى».
افتتحت صفاء «الأتيليه» مؤخراً، ومنذ ذلك الحين، وهى تخصص جزءاً من عملها للأيتام وغير القادرين: «الأسعار دلوقت مولعة نار، والناس بتجهز عيالها بالعافية، وأحياناً بيستلفوا عشان يأجروا فستان، ودى مساعدة منّى بسيطة لهم»، المبادرة التى لاقت إقبالاً كثيفاً من العرائس، وقمن بالتردد على «الأتيليه» فى أوقات مختلفة، واختيار الفساتين الأقرب لأذواقهن: «معنديش كسوف هنا، أول ما العروسة بتدخل باقول لها بيتك ومحلك، كل اللى هنا بتاعك اختارى زى ما تحبى، المهم فرحتك تكمل على خير».
وتحدث صفاء بضاعتها فى «الأتيليه» بأشكال مختلفة من الفساتين باستمرار، حتى تُرضى مختلف الشرائح الاجتماعية: «باجيب موديلات مختلفة كل شوية عشان اللى تدخل عندى تخرج وفى إيدها الفستان».
تعليقات الفيسبوك