الجوكر
«ماسكات وتيشرتات» مرسوم عليها ملامح الجوكر بألوانه الزاهية، ملأت الأسواق حالياً، بعد النجاح الذى حققه فيلم «الجوكر».
مهند وليد، صاحب منفذ بيع «ماسكات» بالمعادى، استطاع بمساعدة 5 من أصدقائه، صناعة ماسك بلاستيك بنفس ملامح الجوكر، للفت أنظار الشباب: «الفكرة إننا تعاونا فى البداية مع إحدى السينمات الشهيرة على تصنيع ماسك الجوكر علشان الاحتفال بالفيلم، والناس تتصور بيه هناك، فوجئنا بأن الفكرة نجحت جداً، والطلب عليها بقى زايد، وبقينا نعمل ماسكات أكتر».
يُصنع الماسك من البلاستيك بطريقة يدوية وبألوان زاهية: «التصنيع بياخد من 4 لـ7 أيام، وبيمر بمراحل مختلفة، وبنعمل منه مقاسات مختلفة»، ويصل سعر الماسك إلى 300 جنيه: «الأسعار متفاوتة حسب المقاس والحجم».
منذ اليوم الأول لعرض الفيلم، أصبح «تريند» على السوشيال ميديا: «إحنا اللى مفرحنا أن كل واحد بيشترى الماسك بيتصور بيه، شخصية الجوكر هى أهم شخصية فى الفيلم، كل واحد بيدخل الفيلم بيتأثر بيها، وبيكون عاوز لما يطلع يكون هو الجوكر».
فى البداية، لم يتوقع «مهند» نجاح الفكرة والإقبال الكثيف عليها: «فى البداية نفّذنا 20 ماسك بس، لكن دلوقتى إحنا مستمرين بسبب نجاح الفيلم». الفكرة نفسها نفّذها إسلام عماد، صاحب منفذ أون لاين لبيع التيشرتات، حيث وجدت إقبالاً كبيراً من جانب الشباب: «من أول ما عرضت الكوليكشن بتاع التيشرت الخاص بالفيلم، وبقى الطلب عليه بالحجز، الصغيرين والكبار عاوزين يحصلوا عليه».
ويصل سعر التيشرت إلى 120 جنيهاً: «الخامة بتاعته قطن، وبنعمل عليها رسومات بالطباعة، إحنا بنهتم بالتيشرتات اللى عليها صور لأبطال خارقين، إحنا عاملين 14 تصميم كلها بتحمل مشاهد من الفيلم وجمل مقتبسة أثرت فى الناس».
تعليقات الفيسبوك