«دورات لتحسين الخط العربى لكبار السن»، فكرة خارج الصندوق نفذتها جمعية خيرية بمحافظة قنا، وذلك عن طريق تقديم دورات مكثفة لكبار السن وربات البيوت لتحسين خطهم السيئ، الذى يشعرهم بالخجل أمام أبنائهم والآخرين.
إبراهيم العسقلانى، صاحب الفكرة، يرى أن الهدف من تلك الدورات تنمية قدرات الكتابة بشكل صحيح ومفهوم: «فيه كبار فى السن بيشتغلوا فى وظايف مختلفة، وبيتكسفوا جداً لما يكتبوا قدام حد، إحنا بنحسن الخط ده فى 30 يوم».
منذ عامين يقوم فريق الجمعية بتنفيذ الفكرة، وذلك بمعاونة عدد من مدرسى الخط العربى بمدارس الخط: «الناس متجاوبة معانا، وفيه تفاعل كبير جداً على مستوى مركز فرشوط، وده اللى مشجعنا نكمل».
ويقوم الفريق بعمل دورات تدريبية مكثفة لتحفيز كبار السن على تحسين خطوطهم فى وقت قصير: «طبعاً تحسين الخط وتعليم الخطوط بحر ملوش آخر، لكن بنحاول نقلل فى الفترة الزمنية، وندى فيها قدر كبير من المعلومات، للتسهيل على المترددين، وبالفعل قابلنا ناس كان خطها سيئ جداً واتحسن».
وبحسب «العسقلانى» فإن عدد المحاضرات خلال الدورة التدريبية المكثفة 30 محاضرة: «بتكون بسعر رمزى بيوصل لـ20 جنيه خلال الدورة بنعمل خصم بيوصل 90%، إحنا أهم حاجة بالنسبة لينا إننا نفيد الناس».
ويصف «العسقلانى» حالة الإقبال على الدورات بالجيد: «الناس مبسوطة والإقبال بيزيد خلال فترة إجازة نصف العام الدراسى، الناس بتكون فاضية وبيمارسوا حاجة مفيدة». وتصل أعمار المتقدمين لدورة تحسين الخط إلى 60 عاماً وأكثر: «ربات بيوت كمان بيلتحقوا بالدورة لتحسين مستوى خطوطهم، حتى لو مش بيشتغلوا، عشان يذاكروا لأولادهم».
تعليقات الفيسبوك