تجميل القرية
لسنوات طويلة كانت واجهات منازل قرية كفر وهب، بمدينة طنطا، تعانى من الشروخ، وأرضها غير مستوية بسبب الحفر والمطبات، وشوارعها غارقة فى القمامة، حتى اجتمع الأهالى ووضعوا خطة لتطوير وتجميل القرية، لتصبح مثل «كومباوند»، حيث قاموا بتوحيد دهانات المنازل باللونين الأحمر والأصفر، وزرعوا الأشجار، وعلقوا الورد بجانب الشرفات الخارجية، وعالجوا الأرض بتركيب بلاط «إنترلوك».
طيلة 45 يوماً، واصل الأهالى جهودهم لتجميل القرية، ولكل منهم دور محدد يقوم به: «فى يوم بعد صلاة الجمعة عديت على رجالة القرية واقترحت عليهم الفكرة وعجبتهم جداً وقالوا ننفذها لأننا اللى عايشيين فيها وهتبقى عيبة فى حقنا لو شكلها فضل وحش».. حسب عبدالعزيز سيد، أحد السكان، لافتاً إلى أن تكلفة دهان واجهة كل منزل 300 جنيه، أما المنازل ذات الأدوار المرتفعة، فتراوحت بين 450 و500 جنيه، وتكلفة تركيب «الإنترلوك» على مساحة 400 متر 31 ألف جنيه، أما الأشجار فكانت تكلفتها بسيطة: «الصغير والكبير فى كل شارع كان شغال وله دور، اللى بيعرف يدهن كان بيمسك الفرش والألوان، واللى بيركب البلاط عمله بنفسه، والأطفال كانت بتساعدنا تناولنا حاجات بسيطة أو تشترى حاجات للمقاولات محتاجينها».
لم يتردد سكان القرية لحظة واحدة، وتكاتفوا جميعاً، وقاموا بتنظيف الواجهات ثم دهانها، وحوّلوها إلى مكان متحضر: «عشان كل حد اشتغل بإيده ودفع فلوس بقوا يحافظوا عليها، مابقاش حد يرمى ورق فى الأرض، والشارع بيتكنس كل يوم، والزرع كل واحد مسئول قدام بيته يسقيه ميّه». أصبح هواء القرية نظيفاً، وشكلها مبهجاً: «القرية بقت تريح الأعصاب».
تعليقات الفيسبوك