حفلة تنكرية وغنائية ورقص شرقى واستعراضات فنية ومسابقات ترفيهية، احتفالات كثيرة ومختلفة بعيد الأم، لهذا العام، تقدّمها فرقة «بنات وبس»، بالتجول فى المحافظات المختلفة، ومشاركة الأمهات الاحتفال وسط أبنائهن، وتقديم الهدايا إليهن.
تتمتع الفرقة بخبرة واحترافية فى تقديم الفقرات الفنية والغنائية بشكل منظم وجذاب: «حبّينا يكون احتفالنا السنة دى مع كل أم مختلف، ونسيب لهم ذكرى وبصمة يفتكروها».. حسب شيماء محمد، مسئولة الفرقة، التى تتكون من 8 فتيات، لكل منهن موهبتها المميزة: «فيه اللى بتغنى، واللى بتقدم رقص شرقى، واللى بتعمل عروض استعراضية، وده أكتر حاجة كنت حريصة عليها، واحنا بنظم ونكون فرقتنا، علشان نقدم فن متكامل ومختلف نقدر نسعد به الناس».
تقدم الفرقة عروضها فى الحدائق والنوادى ومراكز الشباب، وتكون خاصة بالسيدات وأبنائهن: «الحفلة بيكون لها خصوصية تامة، كل أم ومعاها أولادها أياً كان عددهم، وكلنا بنقوم نرقص ونغنى مع بعض، سواء إحنا أو الأمهات والأولاد».
خلال الاحتفالية، تشارك كل أم بتقديم كلمة أمام باقى الحاضرات: «بنسيبهم يعبّروا عن كل اللى جوه قلوبهم ويقولوا أى حاجة فى اللحظة دى، المشاعر بتكون صافية وصادقة جداً، ودى من أكتر الفرص اللى كتير منهم بيستنوها علشان يفضفضوا».
تعليقات الفيسبوك