مسمار وفتلة، هما أدوات عبدالرحمن سمير محمود، يستعين بهما فى عمل لوحات مختلفة تلفت الأنظار، لم يكن الرسم من هوايات «عبدالرحمن» لكن لفت نظره فيديو لفنان أجنبى على «يوتيوب» يبتكر تابلوهات باستخدام مسامير وخيوط، فأراد أن يقلده.
يقول «عبدالرحمن»: «لقيت عندى لوح خشب ودوّرت على صورة وطبعتها على مقاس لوح الخشب وجبت مسامير وبدأت أدق، وكان كل اللى فى دماغى إنى أعمل حاجة مختلفة لأنى بحب الـcreativity والاختلاف». تخرّج «عبدالرحمن»، 24 عاماً، فى كلية الهندسة جامعة الإسكندرية قسم «كهرباء باور» دفعة 2020، ويحب التصوير أيضاً ودمج بين حبه للتصوير ولوحاته. ويعرض خريج الهندسة أعماله على صفحته على فيس بوك «phantasm»: «بعد أول لوحة ليا وبعد ما ردود الأفعال عنها كانت حلوة قررت أكمّل وعملت لوحة تانية لوجه أسد أخدت منى وقت 3 أسابيع وعملتها بحوالى 5500 مسمار، نشرت صور لوحاتى على جروبات، وبعدها جالى عرض من معرض طلبوا منى أعرض لوحاتى عندهم، وفعلاً شاركت ضمن 40 آخرين كلهم فنانين ورسامين فى كليات فنية وأخذت مركز أول فى أول معرض أشارك فيه».
أشاد بلوحات «عبدالرحمن» الكثيرون، منهم من يعمل فى مجاله وآخرون من الهواة والمعجبين بفنه، وعن ذلك يقول: «شُغلى عجب ناس كتير الحمد لله وحابب أقول إنى ماكنتش هعمل أى حاجة من دول غير بتوفيق ربنا أولاً ثم مساعدة أهلى ليا فى كل حاجة عملتها وتحفيزهم الدائم ليا».
تعليقات الفيسبوك