أهالى البساتين يواجهون أزمة المياه بـ«براميل معلقة»
أهالى البساتين يواجهون أزمة المياه بـ«براميل معلقة»
براميل على مواسير المياه
«تخزين المياه فى براميل معلقة فى أماكن التكييفات، تخرج منها مواسير لداخل المنزل».. هكذا حل أهالى منطقة «البساتين» بالقاهرة، مشكلة انقطاع المياه بصورة متكررة والتى قد تستمر لعدة أيام، وعجزهم عن شراء خزانات مياه.
«شلتوت»: اخترعنا «خزان» على قد الإيد
«مش قادرين نشترى الخزانات التى يصل ثمنها إلى 3 آلاف جنيه للمتر الواحد، فابتكرنا (خزان) على قد الإيد»، قال محمود شلتوت، أحد سكان المنطقة، مضيفاً: «مالقناش غير البرميل اللى نخزن فيه الميّه، وبدل ما نشترى خزان يبقى للعمارة كلها وغالى علينا ومش هيكفّينا، بقى لكل شقة خزان لوحده وعلى قد إيدينا».
«التلوث» هى مشكلة «الخزان الشعبى»، بحسب «محمود»، الذى أضاف: «بنخزن الميّه بخرطوم متوصل بالبرميل وبنسحبها من الماسورة بحنفية جوه البيت وكأنه خزان، وسعره 45 جنيهاً وبياخد لحد 60 لتر كمان، بس مشكلته أن البرميل معلقينه على العمارة مكان ما الناس بتعلق التكيف، فمعرّض لتراب الشارع ومش نافع معاه غطاء بخشبة ولا حتة قماشة».
ورغم مخاوفهم من تلوث المياه، فإن «محمود» يرى أنه ليس بيدهم حل آخر: «الميّه عندنا على طول تقطع بالأيام من غير أسباب، كل ما نشتكى يقولوا المواسير سليمة والميّه مش هتقطع تانى وبردوا بتقطع، والبرميل هو الحل بس الميّه بنستعملها فى الحمام بس والأكل صعب عشان مش نضيفة، بس أحسن من مفيش وأوفر من الخزان كمان».
محمد نصير، نائب رئيس حى البساتين، نفى انقطاع المياه عن المنطقة بصورة مستمرة، قائلاً: «الميّه حالياً بتقطع بشكل طبيعى زى أى منطقة، لتغيير المواسير أو تصليحها إذا كان فيها مشكلة، بعد فترة طويلة كانت تعرضت للصدأ وتم انقطاع الميّه فترات ورجعت تانى».