أربعة سائقين من أعضاء الرابطة خلال اجتماعهم الأول
متهمون دائماً بالبلطجة وارتكاب جرائم سرقة وخطف وقتل، صورة ذهنية تلاحق سائقى التكاتك المنتشرين فى المناطق الشعبية، الذين امتد انتشارهم إلى المناطق الراقية أيضاً، وهو ما دفع مجموعة من السائقين فى منطقة عزبة النخل إلى التفكير فى إنشاء رابطة يجتمع تحت لوائها سائقو التوك توك، تكون مهمتها الدفاع عن السائقين وتحسين الصورة الذهنية المأخوذة عنهم.
محمد سعد، سائق توك توك، بعزبة النخل، هو صاحب الفكرة، قرّر بالتعاون مع بعض سائقى المنطقة، تكوين رابطة والاجتماع شهرياً وبحث طرق تحسين صورتهم أمام الأهالى وأمام قوات الأمن التى تشك فى سائقى التوك توك أولاً فور وقوع أى جريمة سرقة أو خطف: «للأسف فيه سواقين مظلومين فى السمعة دى، إحنا مالناش أى مصلحة غير لقمة عيشنا، وأنا نفسى سواق، لكن مش راضى باللى بيحصل، ساعات مابيعجبنيش تصرفات بعض السواقين».
شهد أمس الأول، أول اجتماعات الرابطة، بمشاركة 15 سائق توك توك، اتفقوا على مجموعة من التعليمات ملزمة لجميع السائقين فى المنطقة: «أول حاجة محدش يعلى الأجرة على الناس، ونمشى فى الاتجاه الصحيح، ومانكسرش الشارع على العربيات، لأن ده بيعمل زحمة ودوشة فى الطريق، مش هنخلى حد أقل من 21 سنة يسوق توك توك علشان محدش يتهمنا بالبلطجة».
وحدّدت الرابطة فى اجتماعها أيضاً مجموعة من المطالب، أهمها، منحهم رخصة سير فى الشوارع حتى يغلقوا الأبواب أمام من يستغل المهنة فى ارتكاب أعمال غير مشروعة: «الرخصة دى مش هتخلى أى حد يعرف يشتريه، ولو حد ارتكب جريمة هيتجاب على طول».
قرّر السائقون الاجتماع بشكل أسبوعى لبحث المشاكل التى تواجههم: «قعدنا مرة مع الأهالى، وشُفنا إيه مشاكلهم معانا وحطناها فى الاعتبار، وابتدينا نشتغل عليها واحدة واحدة، المهم أنهم يساعدونا لأننا مش وحشين، وعايزين ناكل عيش».
تعليقات الفيسبوك