على مدار الأسابيع الماضية، شهدت منطقة الربوة بمدينة 6 أكتوبر لفتة طيبة من جانب بعض سائقى سيارات الميكروباص والأوتوبيسات الخاصة، لمساعدة جيرانهم ونقل المواطنين فى تلك المنطقة النائية وحتى الحى السادس بشكل مجانى، خدمة حاولوا توفيرها فى ظل قلة عدد وسائل المواصلات فى المنطقة، الأمر الذى يؤدى إلى تكدس المواطنين بنقاط التجمع بالمدينة صباح كل يوم.
تعاطف محمد عبدالعال، سائق أوتوبيس خاص، مع جيرانه وأهالى منطقته، حيث اتفق معهم على توصيلهم إلى الحى السادس مجاناً: «بطلع بالأوتوبيس بتاعى لحد الشركة اللى بشتغل فيها فاضى مش معايا أى ركاب، فباخدهم معايا فى الطريق الصبح من غير ما آخد ولا مليم، بساعد جيرانى وحبايبى وأهل منطقتى، إحنا هنا عايشين فى منطقة بعيدة وسواقين الميكروباص عددهم قليل والناس قرفت من العربيات الكبوت والحوادث اللى بتنتج عنها».
وبحسب «عبدالعال» فإن منطقة الحى السادس تتوافر بها مواصلات تنقل المواطنين إلى ميدانى رمسيس والجيزة ومنطقة المصانع: «فيه مواصلات هناك متوفرة تنقلهم مكان ما همّا عاوزين، إحنا عندنا مشكلة إن سواق الميكروباص قليل اللى بيروح لحد الربوة لأن الطريق من السادس للربوة 20 دقيقة والأجرة 4 جنيه، أغلب السواقين بيحمّلوا لحد نص المسافة عند منطقة 800 فدان وبياخد نفس الأجرة والطريق مش بياخد أكتر من 10 دقائق»، وبنبرة يملؤها الرضا يصف «عبدالعال» حالة التكاتف بين سكان المنطقة: «فيه كذا سواق بيعمل معايا نفس الفكرة دى، لحد ما يتوفر حل حقيقى يخدم الناس».
يستخدمون سياراتهم الخاصة فى النقل ويطالبون بمنع "العربات الكبوت"
حالة من الرفض للسيارات الكبوت تسود بين سكان المنطقة، ما دعا البعض منهم لرفع دعوات للإضراب عنها، أحمد كريم، رئيس اتحاد ملاك منطقة ربوة أكتوبر، يحاول التواصل مع جهاز المدينة لإيجاد حل سريع: «فيه 3 أوتوبيسات متوفرة وتقريباً ما يقرب من 5 ميكروباصات، إحنا عددنا أكبر، كل اللى بنطالب بيه إن سيارات الكبوت تتلغى من المنطقة لأن معظم سائقيها بيقوموا بأعمال بلطجة، ونفسنا يتم توفير عدد أكبر من السيارات لنقل المواطنين»، ويروى «كريم» أنه سيتم خلال الفترة المقبلة التواصل مع مجلس أمناء المدينة للوصول لحلول: «إحنا لحد دلوقتى كجيران متكاتفين ومتأكدين إن المدينة هتوفر لينا حلول سريعة».
تعليقات الفيسبوك