أنا مش مجبر أضحكلك
مع اللي بيبتسم لك زيف
ولا مضطر أغنيلك
أنا ضد المزاج والكيف
"بحبك، أينعم، لكن"
بَحبّ بقلب جاي مـ الرّيف
لا فارقة معاه يقف ساكت
ولا ينزل ميدان هتّيف
لئيم لو وزّعوكي دقيق
ودون لحظة ما يمسك سيف
ومرّ مرارة الحنضل
إذا دخل المهادن ضيف
أنا مش مجبر أضحكلك
برغم إني فـ هواكي ضعيف
ولا مضطر أغنيلك
برغم إني فـ غناي حرّيف
-بحبك، أينعم، لكن-
مازال جوّايا جزء نضيف
لا يعرف حدّ شكله إزاي
ولا ينفع معاه تصنيف
ولا أعرف أقول ده يطلع مين
ولا أفهملوش هنا توصيف
لأنه بيشبهك في الخوف
وزيّك في المعارك طيف
وكلمة حق لما الحق
يمرق زي سحابة صيف
عظيم الشأن والقيمة
وماهوش محتاج أداة تعريف
ويقتل روحه لو ساوموه
وهوّ فـ حضرتك برغيف
-بحبك، أينعم، لكن-
بَحبّ بقلب جاي مـ الرّيف