«سبوبة» فى مكتب الزواج: استمارة «العروسة» بـ200 جنيه
صورة أرشيفية
«لو عايز تتجوز تعالى عندنا واختار اللى تناسبك»، عنوان لواحد من بين مكاتب زواج انتشرت بشكل واسع الفترة الأخيرة، لكن الإعلان هذه المرة حاول استغلال ما وصفه بـ«الأزمة الاقتصادية» فى جذب الشباب مقابل استمارة بقيمة 200 جنيه فقط.
الشعار: «لو عايز تتجوز تعالى عندنا»
الاسم الذى حاول اجتذاب المواطنين، بدا ساخراً، «الكمال لله وحده» هو اسم مكتب الزواج القريب من محطة سراى القبة، ذكر فى الإعلان الذى دشنه للدعاية: «استمارة بـ200 جنيه وتملى بياناتك ومواصفات الإنسانة اللى انت عايزها وطلبك عندنا»، «الوطن» تواصلت مع المكتب، وقال أحد المسئولين، رفض الكشف عن اسمه: «يوجد لدينا جميع الأعمار من 18 سنة إلى 60، آنسات ومطلقات وأرامل، حضرتك هتدينى بياناتك أسجلها وأحدد لحضرتك ميعاد تيجى فيه تدفع قيمة الاشتراك 200 جنيه، وتملى الاستمارة فيها كل مواصفاتك ومواصفات اللى انت عايزها»، تسهيلات يبديها المكتب، منها محل الإقامة الذى سيقيم فيه العروسان، يضيف: «ده على حسب الإنسانة اللى انت بتحددها، ومش كله عندنا معاه شقة، وأغلب اللى معاهم أرامل ومطلقات، ولكن لو طلبك كده إحنا بنحاول نوفرهولك، ونتصل بيها نحدد ميعاد للمقابلة، ولو حضرتك عايز مكان خارج، يتم الاتفاق على مكان وفيه مسئول من المكتب بيخرج معاك وبيقعد بعيد لحد ما تتم المقابلة».
«الكمال لله» واحد من بين مكاتب عديدة تقوم على نفس النوع من التجارة الذى يواجه برفض كثيرين، محمد يسرى، الشاب العشرينى، اعتبر أن مثل هذه المكاتب مجرد «وسائل للنصب على المواطنين»، مضيفاً: «دى كلها خرافات علشان يكسبوا من ورا الناس وخلاص، ولازم الحكومة تقف للمكاتب دى».
قانونيون أكدوا عدم شرعية هذه المكاتب، منهم حسنى السيد، الخبير القانونى، الذى قال إنها تهدف للربح المادى فقط: «انتشرت هذه المكاتب فى مجتمعنا، وهى غير قانونية استغلت الميديا فى الإعلان عن طلبات الزواج، مما ساهم بشكل كبير فى زواج القاصرات وبيعهم للأجانب بالاتفاق مع بعض السماسرة والمحامين»، يضيف أنه لا بد من وضع هذه المكاتب تحت الرقابة، والتحقيق فى نشاطها لحماية المرأة المصرية وحقوقها.