لو سألوك عن «الفراخ».. قل: الناس بتطلب «هياكل»
آخر فى مركز العسيرات بسوهاج
وقف حال يعانيه الفرارجية فى المناطق الشعبية، ارتفاع أسعار الفراخ البيضاء جعل بعض زبائنهم يكتفون بالهياكل، مؤكدين أنه منذ بدء موسم رمضان والإقبال الأكبر على «أجنحة وأرجل الفراخ»، وحسب «أحمد محمد تونى»، بائع فراخ بفيصل: «الحاجة الوحيدة اللى بتخلص الهياكل، هى مفيهاش لحم بس عند الناس طِعمة، رغم أنها كمان ارتفع سعرها، من 4 جنيه لـ9، والناس بتشتكى، والله العظيم فيه ناس بتقول لى هات لى جناحين على قدى». ارتفاع الأسعار دفع بعض الزبائن حسب «تونى» إلى تقليل الكمية المستهلكة، أما محدودو الدخل فاكتفوا بالهياكل لاستخدام شوربتها فى الطهى: «الحال واقف وأنا عندى التزامات إيجار ويومية الصنايعية، مش فاضل غير إنى أبيع الرجول بـ2 جنيه والهياكل بـ9».
«تونى»: الناس بتشتكى من ارتفاع الأسعار واحنا مش بإيدينا حاجة.. «علاء»: الحاجة غالية عليا زى ما هى غالية على الزبون.. «عبدالملاك»: قاطعوها علشان الأسعار تقل
«علاء محمد»، فرارجى بسوق «كوم بكار» بفيصل، قال إن ارتفاع الأسعار تعدى الحدود المعقولة: «الزبون دلوقتى مش مستحمل، والأسعار مش مستقرة لغاية دلوقتى رغم وعود الحكومة، والحاجة غالية عليّا زى ما هى غالية على الزبون»، مؤكداً أن الأسر الكبيرة أحياناً تشترى فرخة واحدة وتزيدها بهياكل: «هيعملوا إيه طيب؟».
ووصف «حمادة رمضان»، فرارجى، السوق بأنها فى أصعب حالاتها: «إحنا أكتر ناس تضرّرنا من ارتفاع الأسعار، كيلو الفراخ بـ23 جنيه والبانيه بـ58، حتى الهياكل سعرها زاد وبقت بـ10.. بصراحة ربنا يكون فى عون الناس»، أما «عبدالواحد محمد»، فأكد أن الكثير من زبائنه قاطعوا الفراخ بسبب ارتفاع أسعارها، وهو ما أثر على السوق، وأدى إلى ركود لدى الفرارجية.
أسعار الفراخ المرتفعة أصابت «ثابت عبدالملاك»، فرارجى بمنطقة أولاد حمزة بمركز العسيرات بسوهاج، بحالة من الفزع، لدرجة دفعته إلى الانحياز للمستهلك، مطالباً إياه بمقاطعة شرائها لفترة حتى تعود الأسعار إلى ما كانت عليه قبل رمضان: «إحنا لو بطلنا أكل فراخ لمدة شهر بس سعر الكيلو هيوصل 10 جنيه، وممكن أقل». مشيراً إلى أن سعر الكيلو وصل إلى 27 جنيهاً، وهذا رقم مخيف وإذا استمر استهلاك المواطنين بهذا الشكل، فى ضوء الأزمة التى تشهدها مزارع الدواجن من حالات نفوق جماعية ستزيد الأسعار أكثر، وسيصل سعر كيلو الفراخ إلى 50 جنيهاً: «أنا اشتغلت فى المهنة دى من 40 سنة، عمرى ما شفت أسعار زى اليومين دول، سعر كيلو الفراخ كان قبل رمضان 14 جنيه، ودلوقتى وصل لـ25 و27»، مؤكداً أنه مستعد لأى خسارة تحدث له نتيجة توقف الناس عن شراء الفراخ، وأنه فى حال هبوط الأسعار يكون البيع أكثر والأرباح مرتفعة، مطالباً الدولة بعمل حملات دعائية للناس عبر شاشات التليفزيون والجرائد لحثهم على مقاطعة اللحوم والدواجن.
أحد باعة الفراخ فى فيصل