شورت ومايوه وكاب وتاتو ونضارة.. «دقوا الشماسى»
محمد صابر
مع انتهاء مرحلة الثانوية العامة تبدأ مرحلة الإقبال على المصايف التى كان الكثير من الأهالى قد اضطروا لتأجيلها ليطمئنوا على نتائج أبنائهم، أما الشباب فيعتبرون المصيف هو مرحلة الانطلاق ومصدر الحيوية والطاقة، لذا فلكل منهم ستايله الخاص فى ارتداء ملابس المصيف سواء تلك التى يرتدونها على البحر أو فى الخروج ليلاً، واضعين لأنفسهم كتالوج خاصاً بعيداً عن تلك الصور التى يلتقطها المصورون للموديلز وتنشر فى مجلات ومواقع الموضة العالمية.
«بحب ألبس فى المصيف ألوان مبهجة زى البينك والفوشيا والأصفر واللبنى» قالتها مى أنور، 24 عاماً، وهى تعبر عن ضيقها لأنها تجد صعوبة فى العثور على «مايوه» إسلامى بهذه الألوان، حيث إن معظمها أسود ورمادى وكحلى، ويشبه رداء «الغطاسين»، فتضطر إلى البحث عن كل قطعة منفصلة، «بفضل ألبس على البحر كاب بدل الحجاب وأعمل تاتو بدل الإكسسوارات ولازم نضارة الشمس وكريمات مرطبة وواقية للشمس».
وأضافت «مى» أنها تفضل فى الليل ارتداء فستان ملون تقليدى، وشاركتها فى الرأى مى الصباغ، 26 سنة، «بالليل بلبس فستان قصير تحت الركبة ألوانه فاتحة وسادة، وصندل أو بلارينا فلات وشنطة صغيرة وحلق وإسورة وبفرد شعرى».
بينما قالت «الصباغ» إنها لا تفضل ارتداء «مايوه» على البحر، «بلبس بدى كت وشورت يكون ألوانهم بينك أو موف أو أسود، أو كاش مايوه أبيض، وبحب التاتو على شكل فراشة أو مفتاح الحياة أكتر من الإكسسوارات وبحب أرفع شعرى»، وأضافت «مى» أن أهم شىء معها شنطة قماش ملونة كبيرة بها نضارة الشمس وكتاب والكريمات المرطبة و«الهاند فرى».
مصطفى عبدالقادر، 22 سنة، يقول «المصيف ده المفروض المكان الوحيد إللى الواحد لازم ياخد فيه راحته فى كل حاجة، سواء لبس أو نوم فى أى وقت أو خروجات فى أى وقت. ويهمنى أن يكون لبسى فى المصيف عبارة عن قطعة واحدة وانت رايح البحر وقطعتين بالليل وانت خارج، وبينهم عامل مشترك وهو إنك لابس شورت. الألوان مهمة جداً بالنسبة ليا، ودايماً بحب أنسق بينهم وإنهم يكونوا لايقين على بعض عشان ماحسش إنى عشوائى، وطبعاً الحظاظة والخاتم البلاتنيوم من أهم الإكسسوارات عندى، وأحسن حاجة بعملها وأنا فى المصيف إنى بنسى أى حاجة شاغلة دماغى فى القاهرة وبحاول أجدد طاقتى عشان أرجع فريش».
محمد صابر يقول «من المفترض أن يعطينا المصيف طاقة إيجابية، لذلك أحب ارتداء الألوان الفاتحة، كما أننى أعشق اللون الموف وعندما أرتديه أشعر بالثقة والحيوية، أما بالنسبة للنظارات فمن الممكن أن آخذ معى أكتر من واحدة عشان أغيرهم حسب كل طقم».
خبيرة موضة: «الهوت شورت» راحت عليه.. الأزرق والأصفر موضة للشباب هذا العام
وأضاف «ديبو»، 23 سنة، «باخد معايا نضارتين واحدة طبية والثانية شمس نظر، بيهمنى شكل النظارة جداً، وبغيرها قبل ما أطلع أصيف، ، وبهتم جداً باللبس فى المصيف وتناسق الألوان عشان أهم حاجة هى صور المصيف دى، وأفضل الألوان بالنسبة ليا هى الألوان الفاتحة، وبحاول أبعد عن الألوان الفاقعة أوى أو اللافتة للنظر، وبحب ألبس قمصان بتكون مريحة فى الخروج وباخد كتب وروايات معايا علشان أقراها على البحر وبهتم بأنى أعمل قايمة أغانى أسمعها على البحر وخصوصاً وقت الغروب أو بالليل، ولازم الكورة فى الميه أو على الرمل، دى من الحاجات اللى بتحسسك بالمصيف، وإنك تفضل تهزر مع أصحابك بالرمل».
وقالت يارا الكنيسى، خبيرة الموضة إنه بالنسبة للفتيات فى المصيف يفضل اختيار ألوان متعددة فى التيشيرت، قائلة «مش بس لون واحد، عكس الولاد يفضل لون واحد، كمان البنات يفضل يكون فى نقوش كتير، بالنسبة للهوت شورت الجينز راحت موضته خلاص للبنات، بينما الشورت الخفيف هو موضة السنة دى وأفضل ألوانه الأبيض وأكثرها انتشاراً، والموكينى شكله أحلى من البكينى التقليدى وهو بيبقى قطعة واحدة بس مفتوح من الضهر أو الجنب، وكل ما اللبس كان أخف بيبقى أحلى، وبالنسبة للكاش مايوه سابقاً كان طويل أو شفاف، أما موضة السنة دى مخرم ومظبوط على الجسم ويفضل أنه يتلبس على أى مايوه أسود أو منقوش». وأضافت: بالنسبة للإكسسوارات لا يفضل ارتداؤها فى الصباح على حمام السباحة أو الشاطئ، أما الأولاد فيفضل ارتداؤهم «رابيد شورت» على تى شيرت أو قميص فى المساء، والصبح الشورت لون واحد، والمايوه الأزرق والأصفر أكثر الألوان انتشاراً للأولاد هذا العام، كما أن الحظاظات والسلاسل المرصعة بالأحجار موضة للشباب أيضاً.