يا طفل بتبتدي الحركة..
قالولك بكرة لسه هناك..
في نص العالم التاني..
في آخر الدنيا بالتحديد..
وبيننا وبينه ١٠٠ مشوار..
وبيننا وبينه عُمر مديد..
فعيش عالم بريء خالص..
يليق جدا بطفل سعيد..
يا طفل بتبتدي حياتك..
قالولك بكره لسه بعيد..
يا عالم مين يعيش للغد..
لحين ما تخط شنباتك..
يا عالم مين يعيش لما..
نشوفك شحط..
قالولك لسه بدري عليك..
ومن عبطك أكيد صدقت..
قانون السرعة في الفيزيا..
علاقة ما بين مسافة ووقت..
فتسأل كل يوم نفسك..
وصلت لفين وإمتى وصلت..
وإمتى أنا نفسي بتغيّر..
وإمتى كبرت..
وإمتى الوقت بيعدي..
قميص إمبارح المظبوط
بقيسه الصبح مش قدي
وأشوف صوري اللي من شهرين
ملامح وشي مختلفة..
أنا اتغيّرت وكأن الصور من دهر..
في دي خاسس.. في دي تخنان..
بقيت بضحك كتير بهدوء..
بقيت مبحبش الألوان..
بقيت أهتم بالحسابات..
واقضي الوقت وأنا سرحان..
أنا اتغيرت رغم إن الزمن ماجريش..
كبرنا بسرعة جنونية..
وكل الناس أهي بتمسك..
في ديل المرحلة الفايتة..
تخاف المرحلة الجاية..
أكيد العيب ده مش فيا..
فعايز دايما أتصور..
وعايز أثبّت الثانية..
دليل يثبت معدل سرقة الأعمار..
معدل سرعة الدنيا