عزيزى بديع الجمهورية
أبانا الذى فى مكتب الإرشاد
نحن رعاياك
.. ..
سلام ورحمة
وبركة وخير
ومسك وعنبر
وعطر وفير
وتهليل وزحمة
وحشد غفير
وزيت وسكر
وتموين كتير
وبعد التحية
بكرر سلام
واقدم فخورا عظيم الاحترام
لمن مش كفاية عليه الكلام
يا زينة ما ربى الشهيد الأمام
يا سيف
يا درع
لإسلام
وشرع
يا حامى لديننا
يا فارس همام
يا سيد الخلايق
يا ديك البرابر
يا من ياما ضحى
وجاهد
وثابر
وقاد ثورة ناجحة
سببها المنابر
وسرقوها منه
وساكت وصابر
وراضى إنه يخدم
بعيد فى الظلام
بكرر سلامى
وبعد السلام
بقولك هاهأو
هاهأو
هاهأو
هاهأو يا سيدهم
يا عقل لإيدهم
وعد الهاهأو
عشان لما هسأل
أحبك مركز
وحافظ عددهم
هاهأو لهيبتك
هاهأو لبيعتك
هاهأو لسمعك
هاهأو لطاعتك
هاهأو لحزبك
وأعضاء جماعتك
آه لا تكون فاكرنى
مصدق لدجلك
ونصبك بدقنك
وأدبك وخجلك
وكورنر شريعتك
ولفك وجدلك
وحلمك وحبك
لمن جر شكلك
سيادتك هاهأو
هاهأو بشدة
ويا ريت الهاهأو
هتقدر تفيدنا
زعلت يا سيدنا؟
لا إوعى
بهزر
بهجص
بنظر
بناغشك
سمو الخليفة المظفر
وطمعان فى كرمك
وبحلم تجود
يا ماسك خيوط العرايس
فى إيدك
وعقلك معدى المدى
والحدود
وحاكم بأمرك
على رقاب عبيدك
لقامتك حلال الركوع والسجود
لا أنا من عشيرتك
ولا من فصيلتك
وكل اللى طالبه يا حضرة فضيلتك
إقرار وممضى
من اتنين شهود
وفيه تعترفلى
بحق الوجود