بائع أحذية مستعملة: «الجوز بـ7 ونص يا حزين يا مفلس»
بائع أحذية مستعملة
«الجوز بـ7 جنيه ونص يا حزين يا مفلس»، نداء ساخر يستخدمه فى جذب الزبائن لبضاعته المستعملة، التى يراعى سعرها ظروف المواطن الكادح الذى لا يجد فى جيبه ثمن شراء حذاء جديد، كرم أحمد على، بائع أحذية مستعملة فى سوق السيدة عائشة، يجلس ساعات طويلة أمام فرشة تحوى عدداً من الأحذية ولا يتوقف عن النداء ربما يلفت سعرها أنظار المارة.
لا يتعب «كرم» ولا يمل من طول النداء، فكل أمنيته أن يتخلص من بضاعته الراكدة التى لا يقبل عليها أحد، بلغ من العمر 71 عاماً، ولم يفكر يوماً فى الراحة: «راحة إيه أنا صاحب عيال، وعندى مصاريف كتير، ومعايا بنت مطلقة قاعدة عندى شايل همها وهم مصاريفها».
فى السابق كان يبيع الحذاء مقابل 20 جنيهاً، وأنواعاً أخرى مقابل 30 جنيهاً، لكن ما تبقى من المجموعة الأخيرة عرضه للبيع مقابل 7 جنيهات ونصف الجنيه فقط: «مش ناقص غير إنى أعرضهم ببلاش عشان الناس تيجى تشترى، دول آخر شوية، وعايز أخلص منهم عشان أنا محتاج فلوس، وبعدين مين هيشترى جزمة بـ20 جنيه، الناس هنا مفلسة وماحلتهاش اللضا».
لا يتمنى «كرم» شيئاً سوى أن يقدره الله على العمل لكبر سنه وإصابته بمرض فى القلب: «نفسى أقدر أكمل، ولو بكسب قليل عشان عندى مصاريف كتير، ومقدرش على قعدة البيت».