وأنا قررت أستمتع..!!
حاتم سعيد
فكرت مرة بجد إنك تستمتع بكل شىء فى الحياة بتعمله؟
سيبك من الكلام الكتير والشماعات اللى دايماً بنعلق عليها كل حاجة بتقابلنا، والسوشيال ميديا اللى كفيل يصدر لك سلبية تكفيك عشرين سنة قدام، وركز معايا، إزاى أنا ممكن أستمتع بكل حاجة بعملها؟
يعنى مثلاً نقسم الموضوع للأشياء التقليدية اللى كلنا عارفينها من شغل أو دراسة، بيت (أهلك)، صحابك، وحتى علاقتك العاطفية.. ببساطة أول حاجة تقدر تعملها إنك تخصص لكل حاجة وقتها ومفيش حاجة تيجى على وقت التانية، بمعنى ماينفعش حياتك كلها تبقى شغل ودراسة وساعتها هتتخنق وتقفل من الدنيا، ولا حياتك تبقى كلها خروجات وفسح وتهييس ومستقبلك يضيع..!! التوازن مطلوب.
تانى حاجة ممكن نفكر فيها هى الاستمتاع بشكل حقيقى، أقدر أستمتع بشغلى ودراستى وإلا ببساطة لو أنا متضايق أغير مجال دراستى أو شغلى وأفتكر إن الدراسة ممكن تدرس اللى تحبه بطرق مختلفة، إحنا بقينا فى 2016 والشغل ماتخافش لأن اللى بيرزق الله لو مابتحبش شغلك غيّره وصدقنى دراسة أو شغل وانت مستمتع الموضوع هيختلف تماماً هتقدر تنجز أكتر وتحقق حاجات فى شغلك بسرعة وتتفوق فى دراستك بشكل أسرع طول ما انت مستمتع وبتحبه.
فكرة وجود هدف لحياتك ده شىء مهم جداً يحسسك قد إيه الدنيا وحياتك دى ليها معنى، مش عايشها كده وخلاص، ولو حققنا الفكرة الأولى؛ أنا بشتغل أو بادرس شىء أنا بحبه أكيد عندى هدف هوصله وهقدر أحققه وأنا بتعب فى تحقيقه هكون مستمتع بمجهودى وتعبى ده.
علاقاتنا الإنسانية شىء مهم جداً فى حياتنا بتبدأ من أول البيت وعلاقتى بأهلى مروراً بأصحابى وزمايلى ولحد ما نوصل لعلاقاتنا العاطفية، يعنى إدى وقت لأهلك تقعد معاهم، حسسهم بوجودك وده ممكن تنظمه فى يوم أجازتك، إديهم ساعتين من غير ما تكون ماسك الموبايل فى إيدك، اقعد معاهم، أصحابك وأصدقاؤك دى بسيطة افتكر دايماً إنك مش مجبر تعرف حد بمعنى لو مش مبسوط ولا مرتاح مع ناس ماتستسلمش لفكرة دول زمايلى وصحابى، لا اعمل صداقات جديدة لناس يكون فى بينكم شىء مشترك وإنسانى وحب حقيقى خد قرارك دلوقتى، واستمتع بكل شىء.
دمتم سالمين..