لو كنت مكانه: شاب أدمن مواقع السوشيال ميديا ومش عارف يبعد عنها
صورة أرشيفية
محمد عبدالمنصف (24 عاماً): والله الواقع اللى إحنا فيه ميشجعش نعيشه أصلاً، فأنا أحسن لى أعيش فى الواقع الافتراضى.
أحمد فتحى (23 عاماً): طالما هيعمل لى مشاكل فى حياتى وهيعطلنى عن شغلى وحياتى هقفله خالص وهتغلب عليه لأن الفيس بوك دلوقتى بقى أقوى من المخدرات.
رحاب أحمد (24 عاماً): هدور على نشاط جديد زى «الموسيقى» وأشغل بيها وقتى اللى بضيّعه على السوشيال ميديا، وأحاول أرجع للواقع تانى اللى كان مجمعنا.
عبدالرحمن زكريا (26 عاماً): هرجع علاقتى مع أصحابى تانى، وننزل نخرج أو نزور قرايبنا وماهتمش بالأبليكيشن كتير، المهم مابقاش مدمن سوشيال ميديا.
إسلام طارق (23 عاماً): هاهتم بالرياضة والدراسة أكثر من الأول وأشغل وقتى على أرض الواقع عشان مركزش مع السوشيال ميديا بس.
مصطفى محمد (23 عاماً): مينفعش أخلى حاجة ترفيهية تسيطر عليا ولا على حياتى، عشان كدا هاخد قرار فوراً وأبعد وأمارس رياضة وأرجع أقعد مع أهلى تانى.
منة الله محمد (23 عاماً): ممكن أحاول أشغل وقتى بمسلسلات أو أفلام أو أقرأ رواية وأخرج مع أصحابى وأقعد مع أهلى، وواحدة واحدة هترجع أيام زمان تانى.
حسام سمير (26 عاماً): مش هخلى السوشيال ميديا تؤثر على حياتى، وهركز فى شغلى أكثر، وأبعد عن الموبايل قدر الإمكان، ونرجع أنا وأصحابى على القهوة من تانى.