#اشتغلوك_فقالوا
صحيح أن هذا الهاشتاج يبدو لك صادما، لكن بعض الصدمات تكون إيجابية، الحقيقة التي لم يرد البعض أن يطلعوك عليها وظلوا "يشتغلونك" ويقولون أن ثمة مصطلح يسمى تنمية بشرية.. دعنى أكون صادما أكثر..
أولا: مفيش علم اسمه تنمية بشرية
الأديب والكاتب الأمريكي ديل كارنيجي من بدايات القرن العشرين كان ملاحظ إن مستوى تعليم وتنمية مهارات الكبار "البالغين" منخفض ومتدني، بالإضافة لوجود ركود اقتصادي ومعدل عالي من دوران العمالة في المجتمع الغربي، فبدأ ينشر فكرة تعليم الكبار مهارات جديدة مثل "التواصل، وفهم العلاقات، والخطابة" لأنها بتزود من الثقة بالنفس، وده هينعكس على أداء الأفراد سواء في حياتهم الشخصية أو العملية، و بدأت كتاباته تنتشر، وكمان كتابات نابليون هيل، وكتابات والد إمرسون، ولو كانت تاريخيا قديمة ويغلب عليها الطابع الأدبي أكتر من النفسي أو العملي، وحتى برتراند راسل الحائز على نوبل في الآداب كتب عن فلسفة السعادة، ربما لأن من عام 1911 وحتى منتصف السبعينيات سادت موجة الكتابة في التحفيز والنجاح و الطموح، ولم يقل أي من هؤلاء الأدباء والكتاب، وحتى خبراء الإدارة المخضرمين لفظ "تنمية بشرية".
ثانيا: الكتب اللي انكتبت مش عربي.. بس مترجم بحذافيره
يعني نسبة 80% من الكتابات وبرامج التدريب والكورسات مأخوذة من كتابات غربية مترجمة، حتى أن البعض لا يجيد التعريب ولا الترجمة فلا يغير حتى العملة في الترجمة.
ثالثا: عارف إن في دماغك سؤال
إزاي أنا شخص بيشتغل في التدريب والاستشارات وبكتب إن التنمية البشرية اشتغالة؟
إنت جاوبت بنفسك يا أفندم
أنا استشاري تطوير وتدريب للمهارات الشخصية والمؤسسية، وصممت برامجي في مجال تطوير الذكاءات السبعة ومهارات الحياة الذكية، يعني مش بتاع شعوذة.. أنا اللي اتعلمته إن مفيش كلمة تنمية بشرية دي إلا في تقرير الأمم المتحدة السنوي، مستوى معيشة الفرد في الدول وهكذا.. اللي أعرفه فيه حاجة اسمها تنمية مهارات "شخصية، سلوكية، إدارية، قيادية، رياضية، روحية" مثلا، وده اللي العالم كله بيشتغل عليه ويطوره، بيعتمدوا على مزج تطبيقات ونظريات من علم النفس وأنواعه، وعلم الإدارة والقيادة وغيرها من العلوم المعترف بيها.. مش تحفيز وبس.. وكلمتين جذابين وكتابين مترجمين.
الحقيقة تقول التحفيز حلو بس مش بيوصل للنجاح ولا التميز، لازم علم وفهم وتطبيق مناسب لشخصيتك ولبيئتك ولقدراتك.
خليني أستغل العناوين البراقة وأقول لك:
12 حقيقة لا يريدك بتوع التنمية البشرية معرفتها
1- دكتوراة وماچيستير ودبلومة في التنمية البشرية "مفييييييش"، كل دي مسميات أفعوانية وملهاش لزوم.. معلش بقى.
2- موضوع الماچيستير المصغر ده اسم تجاري وليس شهادة أكاديمية.. متزعلش.
3- البرمجة اللغوية العصبية والتنويم الإيحائي محتاجين حد متخصص عشان تتعلم منه، مش أي حد قرأ كتابين يبقى متخصص.
4- علوم الاستشفاء الحركي زي اليوجا والتاي تشي والتشي جونج، مفيدة جدا بس لما تكون من غير شعوذة.. إدي العيش لخبازه.
5- مفيش حاجة اسمها مدرب دولي عشان راح محافظتين وكام نجع.
6- مفيش حاجة اسمها خبير تدريب إلا لما تمارس المهنة بتاعة التدريب مش أقل من 10 سنين.
7- مفيش حاجة اسمها كورس استشاري تدريب وتطوي، ده لقب ومهنة بتتكون مع الخبرات وعدد المشاريع الاستشارية اللي اشتغلتها مع جهات محترمة.
8- الـ"لايف كوتش"، أو "الأخصائي النفسي" ألقاب مش من حقك تستعملها إلا بعد ممارسة حقيقية ودراسة للمهنة دي مش أقل من 3 سنين.
9- الـ"لايف كوتش" مش دكتور نفسي ومش بيعالج المرضى النفسيين.
10- متروحش لدكتور سمنة تخين، ولا تروح لخبير علاقات أسرية حياته الأسرية فاشلة.
11- التدريب علم و له أصول وتطبيقات، مش بس شهادة أكاديمية أو لقب براق.
12- كل ما تشوف اسم الأكاديمية "الدولية / العالمية /..." لازم تقلق.