«آدم».. أصغر عارض أزياء فى مصر «لسه ماقلعش البامبرز»
آدم
ملامحه الجذابة تلفت أنظار الجميع إليه، فوجه آدم محمود الملائكى وعيناه البريئتان جعلته يدخل فى عالم «الموديل» رغم صغر سنه، فالطفل الذى أكمل عامه الثانى شارك فى العديد من عروض الأزياء وعمره لم يتعد الـ5 أشهر، حتى أصبح أصغر عارض أزياء فى مجال «الفاشون والموضة».
حب والدة «آدم» لمجال الفاشون والموضة، دفعها إلى إشراك ابنها «آدم»، في عروض الأزياء، وكثير من صفحات الفاشون على موقع «فيس بوك»، وهو ما أكده محمود طاهر، والد الطفل: «مامته حبت فكرة الفاشون، وإنها تلبسه ملابس الأطفال اللى على الموضة، كانت بتصوره وتبعت صوره على صفحات الفاشون، لحد ما اختاروه فى مسابقة شهر 5 اللى فات، وقالوا إنه طفل وسيم ومميز من بين 15 طفل فى الجروب المعروف (ليتل فاشونيستا)»، بداية اكتشاف «آدم» وشهرته، جاءت عن طريق مصور فوتوغرافى، طلب تصويره «سيشن» فى شهر رمضان بالعباية والفانوس والمصحف: «بعد أول سيشن فى رمضان تقريباً بقى الناس يطلبوا إنه يتصور بملابس الأطفال الجديدة لعرضها وتسويقها».
حالة من السعادة والفرحة، انتابت الأب بعد أن انتشرت صور «آدم» فى الكثير من صفحات السوشيال ميديا: «لما الصور انتشرت جاله عروض تصوير كتير من مصورين تانيين، صوروه، وبقت دعاية ليهم، وآخر حاجة صور إعلان مدفوع كدعاية لقسم الأطفال فى مركز عيادات أحد الأطباء، وجلسة التصوير فى اليوم بيوصل ثمنها من 150 لـ400 جنيه». لم يدرك «آدم» طبيعة عمله الذى بدأه فى سن مبكرة، لكنه اعتاد على أنوار الكاميرات ووجوه الأشخاص المختلفة التى يراها يومياً: «هو طبعاً مابيبقاش فاهم إنه بيتصور لشغل، كان فى الأول بيشوف كاميرات وناس بيتخطف شوية، ولما يبدأ المصور يكلمه ويضحكه بياخد عليه، وبيقدروا ياخدوا منه الصور اللى عايزينها، وهو اتعود خلاص، وكأنه حاسس إنه بقى مشهور».