مبادرة «حكمت»: «فستان فرح ببلاش».. والمفاجأة: «محدش عاوز»
«حكمت» تُفصل فساتين الزفاف مجاناً
طوال سنوات دراستها بكلية التجارة لم تتخيل حكمت سمير نفسها سوى مصممة أزياء، لذا سارعت لتلقى دبلومة خلال سنوات دراستها فى مجال الأزياء لتتخرج منها بتفوق، وتؤسس صالون الأزياء الخاص بها، حيث تقوم بتصميم وحياكة الملابس لأبناء مدينتها فى دكرنس بالدقهلية، مساعدة خاصة حظيت بها من خطيبها فى تأسيس مشروع أحلامها جعلها تدرك أهمية المساعدة، لذا قررت أن تتبرع شهرياً بفستان لعروس غير مقتدرة، متكفلة بكافة مصروفاته بداية من سعر القماش، مروراً بالحياكة والإكسسوارات، دون أى شروط أو مطالبة برد الفستان بعد الفرح: «اللبس الحاجة الوحيدة اللى بتهون على الواحد شوية، وكبنات بنحب يكون عندنا حاجة شكلها حلو، وبتاعتنا، مش حاسين إنها متأجرة ومضطرين نرجعها بسرعة، الإحساس ده بيفرق فى الفرحة وفى الثواب أكيد».
الفستان الذى يبلغ ثمن قماشه 500 جنيه على الأقل لم يكن السعادة الوحيدة التى قررت حكمت التبرع بها: «فيه ناس لما سمعت بالمبادرة بتاعتى اتبرعوا بفساتين الزفاف اللى عندهم، وفيه بيوتى سنتر قرر يتبرع بعمل ميكب مجانى ومحل إيشارب قال إنه هيتبرع بالطرحة»، جهد تبذله الشابة مع إيمان: «اللى بيتعمل معاه خير بيحب يقدم هو كمان الخير لغيره وبتكمل الدايرة».
تكلفة الفستان الواحد 500 جنيه
على الرغم من الخدمات المجانية لغير القادرات، لم تتقدم واحدة بعد منذ بداية المبادرة قبل شهر من الآن، ما أثار دهشة الشابة: «مش عارفة هل العرايس كلهم بقوا قادرين ولا المبادرة محتاجة توصل لناس أكتر ولا مكسوفين ولا إيه الحكاية؟».