ويبني الليل متاريسُه فـ هيئة طوق وأنا بسهر
ويحكي بخوف حواديه أبص لصورتي واتحسر
والملم ذكرى معطوبة
فـ ورقة لقيتها مكتوبة
بخط هزيل ومتكسر
يا أجمل كدبة عيشاني فـ لقطة حلم متفسر
وأقول يا مكان يا لمة صحبة منصوبة
وأقول يا زمان حبيبتي زمانها مخطوبة
وأقول بكفاية للأحزان أنا إنسان مانيش طوبة
وأقول كان حلم أعيش بحلم بعين متكونش معصوبة
كان جرالي إيه و إيه حاصل
يا صوت مجروح مهوش واصل
يا كدبة حقيقة مفضوحة لا هى إعلان ولا فاصل
أنا التايب لكن للذنب مش عاصي
أنا اللي عشقت أحلامي كتم لي العشق أنفاسي
أنا الظالم وأنا المظلوم / أنا الجارح وأنا المدبوح
أنا التارك لكن مجروح أنا لهمي بقيت واصي
أنا العاصي أنا الرافض أدوق الليل بلاش اسكر
بلاش اسهر فـ ليل سكران مهوش دريان ولا واعي
لا هو قادر يكون صاحب ولا حاسس بأوجاعي
مفيش داعي تكون قدري ولا لحبك هكون ساعي
مسير الفجر يضحكلي ويثبتلي إن اللي فات مسؤول
يحقق بكرة أحلامي وأكون فاعل مش المفعول