مواطنون يتحدون «إنفلونزا الطيور» ويشترون الدواجن: لو فيها فيروس هيخافوا يبيعوها
مواطنون أقبلوا على شراء الدواجن رغم انتشار المرض
استمر إقبال المواطنين على شراء الدواجن خلال الأيام الماضية، رغم كشف عدد من مديريات الطب البيطرى فى محافظات مختلفة عن ظهور بؤر جديدة لمرض إنفلونزا الطيور وإعلان حالة الطوارئ بها، وقال عمر سمير، أحد تجار الدواجن بمنطقة الوايلى: «الناس بتاكل عادى وعايشة ومفيش أى مشكلة ولو الفراخ فيها أى حاجة إحنا هنعرف قبل المواطن والضرر هيصيبنا الأول والسعر مش ثابت وكيلو الفراخ البيضاء من حوالى 10 أيام وهو بـ22 جنيه»، وقال مصطفى محمد، تاجر دواجن بمنطقة حدائق القبة: «الأسعار بتختلف فى حدود نص جنيه الفترة دى ساعات بتزيد أو بتنزل يعنى مثلاً بمناسبة عيد الإخوة المسيحيين تلاقى الفراخ زايدة نص جنيه وكيلو البلدى بيتراوح من 27٫5 إلى 30 جنيهاً»، وقال تاجر آخر، رفض ذكر اسمه: «سعر الفراخ بقاله شهرين زى ما هو، كيلو البلدى بـ30 جنيه، والناس بتشترى الحمد لله ومفيش حاجة اسمها إنفلونزا الطيور دى صفقة دواجن مجمدة، واحتمالات وجود الفيروس فيها مش موجودة»، من جانبه قال محمد حامد، تاجر فى منطقة حدائق القبة: «سعر الفراخ مش ثابت إحنا بنبيع حسب ما بنجيب بالجملة من المزارع»، أما عن منافذ البيع المتحركة للقوات المسلحة «تحيا مصر»، بمنطقة حدائق القبة، فتباع بها الدواجن المجمدة بسعر 22 جنيهاً للكيلو، فيما يصل سعر الكيلو للمجمد فى محلات السوبر ماركت من 28٫5 إلى 42 جنيهاً.
وقالت هدير عصام، وهى تبلغ من العمر 27 عاماً، ربة منزل، : «أغلب استهلاكنا فراخ أو سمك وأسعارها حالياً معقولة لكنها مش ثابتة.. يا ريت تقل عن كده لأن كل حاجة غالية ومفيش أى زيادة فى المرتبات عشان نغطى مصاريف البيت والمعيشة».
مواطنون أقبلوا على شراء الدواجن رغم انتشار المرض