«مظاهرات الفراشة».. أحدث صيحات الإخوان.. وخبير أمنى: «حرامية شقق»
«مظاهرات الفراشة» هكذا أطلقت جماعة الإخوان على الشكل الجديد لمظاهراتها، وقامت بتجريبها فى شبرا، وهى طريقة تسمح لهم بالوجود الكثيف فى عدة أماكن خلال أوقات متقاربة، تتلخص تقنية «الفراشة»، بحسب «عمر»، أحد المشاركين فيها: «يعنى تكون واقف فى مكان وعامل نفسك من بنها، وأول ما تسمع صفارة، بتروح ناحية الصوت وتبدأ هتاف لمدة 10 دقايق تقريباً، وبعد ما بتسمع صوت الصفارة تانى تمشى من المكان وكل مجموعة تمشى فى ناحية وبيتقابلوا فى نقطة تانية يعملوا نفس الكلام».
«عمر» وزملاؤه يبررون طريقتهم بأنها اتقاء للشر: «علشان البلطجية وقوات الأمن ماتلحقش تيجى تقبض على حد أو تضرب حد، لأننا بنقف لمدة 10 دقايق تقريباً وبعدين نختفى وسط الشوارع ومحدش عارف إحنا رايحين فين بعد كده».
«دى حاجة شبه الحرامى اللى بيخطط لسرقة شقة، فيحوم حواليها، ويدرسها ويخطط هايعمل إيه ويهرب إزاى» قالها اللواء جمال أبوذكرى، الخبير الأمنى، مساعد أول وزير الداخلية الأسبق، محملاً المسئولية كاملة فى انتشار وتطور مظاهرات الإخوان إلى الحكومة الحالية: «هذه جماعة إرهابية لا تختلف كثيراً عن الحرامى الذى يجرى تحريات قبيل السرقة، ويغير أسلوبه مرة بعد مرة»، وتساءل: «كيف لم يصدر حتى الآن قرار بحل هذه الجماعة؟ وكيف يتم السماح لهم بتنظيم المظاهرات رغم حظر التجول والطوارئ؟»، متهماً حكومة «الببلاوى» بالتقاعس والإهمال.