حتى المصيف بالتقسيط: ادفع 200 جنيه والباقى «حين ميسرة»
رحلة إلى مدينة دهب بالتقسيط
ارتفاع الأسعار وغلاء المعيشة وما نتج عنهما من عزوف المصريين عن الرفاهيات، والاكتفاء بضرورات الحياة فقط، دفع بعض شركات السياحة وملّاك العقارات الخاصة، إلى توفير خدمة المصيف بالتقسيط، عن طريق توفير غرف وشقق للمصطافين بنظام الدفع المريح وبمقدم حجز بسيط يغريهم على التقديم.
شركة سياحة تنظم رحلات إلى مدينة دهب بنظام التقسيط، الفرد 850 جنيهاً فى فندق 4 نجوم، و950 جنيهاً فى فندق 5 نجوم، على أن يتم دفع مقدم حجز 200 جنيه فقط، والباقى بنظام التقسيط حتى موعد الرحلة: «بنوفر للمصيفين انتقالات، حتى داخل المدينة، وهناك وجبة إفطار ضمن سعر الرحلة»، بحسب يحيى البنا، مسئول بإحدى الشركات، موضحاً أن برنامج الرحلة يشمل نقل المصطافين لزيارة بعض الأماكن داخل المدينة طوال أيام المصيف: «الميزة أن الناس مش هتحس بفلوس المصيف نهائى كل ما يكون معاهم فلوس زيادة بييجوا يرموها هنا ويمشوا، وده مش بيأثر على ميزانياتهم». تبدأ الحجوزات الخاصة للمصيف، بداية من أبريل الجارى، وتنتهى فى أكتوبر المقبل، وخلال تلك الفترة يمكن دفع المقدم والانتهاء من سداد الأقساط حتى موعد الرحلة: «بعد رفع الأسعار ناس كتير كانت شايلة همّ هتقدر تطلع مصيف تانى زى ما هى متعودة، بس ده أحسن كتير ومش هيبقى الحمل تقيل عليهم».
شركة سياحة توفر رحلات إلى مدينة دهب بـ850 جنيهاً للفرد.. وسمسار يؤجر الشقة بـ2850
يوفّر محمود مصطفى، يعمل فى إحدى شركات السياحة، أنظمة تقسيط مميزة، داخل فنادق 4 نجوم، فى مدينة الغردقة، ويصل سعر الفرد إلى 900 جنيه: «يدفع المقدم اللى عايزه، المهم يحجز ويدفع الأقساط اللى عليه قبل الرحلة». يستأجر محمود المهدى، بعض العمارات فى مدينة مرسى مطروح، ويعرض شققها على المصطافين بنظام التقسيط، يبلغ سعر تأجير شقة غرفتين لمدة أسبوع 2850 جنيهاً، والشقة 3 غرف بـ3350 جنيهاً، ويقوم المصطافون بدفع 1000 جنيه مقدم حجز، وتقسيط المبلغ المتبقى حتى 15 يوماً قبل الرحلة، كما أنه يوفر للمصطافين الانتقالات ذهاباً وإياباً: «الشقة بيبقى فيها كل حاجة، تكييف وسراير وبطاطين وأدوات مطبخ، وهمّا يجيبوا أكلهم ويتعاملوا كأنهم فى شقتهم، وفيه ناس بتحب تصيّف فى شقق أفضل من الفنادق عشان تاخد راحتها وتعمل أكلها بنفسها».