أسرة ترفض التخلى عن عقار عمره 300 عام: بيت العز يا بيتنا
حسين جاد
عقار يعود عمره إلى أكثر من 300 عام، وما زال محتفظاً برونقه وجماله وعراقته، يُعد أقدم العقارات الموجودة بشارع المعز بمنطقة الحسين، حسين جاد، 50 عاماً، صاحب العقار الذى ورثه عن أجداده، لم يستطع التفريط فيه لما شهده من ذكريات عديدة مرت عليه فى هذا البيت القديم: «أنا وارث البيت ده أباً عن جد، وعن جد الجد كمان».
على مدار 50 عاماً، عاشها «حسين» داخل شارع المعز، وجد اختلافاً كبيراً حدث بالمنطقة: «الدنيا زمان كانت أهدى من دلوقتى، كانت الجمالية ليها رونق تانى مختلف»، يتذكر زمن الفتوات: «الفتوة كان رمزاً من رموز الجدعنة والشهامة فى المناطق الشعبية، ودى حاجة عمرى ما هانساها، نفسى ترجع تانى، لأن الفتوة كان بيحافظ على حتته، ماكانش بلطجى، وماكانش حد بيقدر يقرب من منطقته».
أكثر ما يثير استياءه هو حالة الزحام التى يشهدها شارع المعز، الذى أصبح يزخر بزوار من طبقات مختلفة: «الشارع بيدخله أى حد من أى طبقة، لو عملوا تذكرة، حتى لو بجنيه للشارع هيقلل شوية من الناس الغريبة اللى بنشوفها ساعات فى الشارع، وهيقلل الزحمة».
يحتوى العقار على 3 طوابق وفى أسفله محل لبيع الشيش، ورغم عراقته فإنه يحمل طابع الحداثة: «الناس بتستغرب لما تشوف سلالم البيت العتيقة ومن برة لسه محتفظ بجماله والمشربيات والحلى القديمة، لكن من جوه هو بيت عصرى جداً يلائم المعيشة فى الوقت الحالى»، وحسب «حسين» عرضت عليه جهات حكومية شراء العقار، لكنه لم يوافق هو وأسرته: «البيت ده لينا فيه ذكريات، ولأجدادى ذكريات ما قدرش أفرط فيها».