م الآخر| بس يا سيدي
بس ياسيدي
رحت مزعق
وقلبتلها الوش التاني
فـ لقيتها اتحمقت بسهولة
وكالعادة بتبكي فـ أحضاني
رحت مسحت دموعها بسرعة
وقلتلها يا مجنونة بهزر
أنا من عادتي بحب أرخم
ع الناس اللي تكون وحشاني
أنا معقولة أزعل روحي
طب لو روحي هتزعل مني
إزاي هبقي بنفسي فخور
دا إنتي الشمس فـ عز غيومي
وإنتي سمايا وكل نجومي
وإنت الزرع لأرضي البور
أنا لو طير تبقي إنتي جناحي
وإزاي طير بقى يعلى لفوق
إذا كان عنده جناح مكسور
بس ياسيدي
يا دوب خلصت كلامي ساعتها
وعينك ما تشوف إلا النور
قالتلي كلام خلاني أتهز
عارف قالت إيه؟
خد عندك
هفضل أعاكسك كل شوية
وهرسم ضحكة يوماتي في خدك
هتكون حاسس إن العالم
كله حبيبي ملكته فـ يدك
وإنّ ما حدش في الكون قدك
وحاجات تانية قالتها كتير
خلت عقلي خلاص هيطير
نُصها تايه من تفكيري
وقت الجرح هخفف ألمك
ساعة النصر هكون لك علمك
مش هسمحلك تعشق غيري
طب ولعِلمك
مش راح أسيبك حتى في حلمك
هكون لك قدرك.. وإنتا مصيري
قربت وبصيت في عنيها
ورحت بايسها كمان في جبينها
ومن فرحتها.. وحبها ليا
شفت دموع الفرحة في عينها
واتكلمنا كتير ورغينا
عن أسرار.. دي ما بيني وبينها
ولما مسكت إيديها بحب
مسكت هي بشكل غريب
وكأن إيديها
بتحضن إيدي