م الآخر| الحياة "باكيدج"
هي الحياة حلوة ولا وحشة؟ سؤال بيحير صح ؟ لأ هي حلوة، أصل فيها بابا وماما واخواتنا اللي بنحبهم أوي وفيها كمان شوية الصحاب اللي طلعنا بيهم من بين ناس كتير وحبناهم وحبونا وفيها شوية خروجات مجنونة بنرجع بعدها مهدودين بس الضحكة بتبقى من هنا لهنا.
فيها ركعتين الفجر اللي بتخلصهم وتحس إن الدنيا كلها مفتوحة قدامك وفيهم دعوة أمك اللي من غيرها مش هتعرف تمشي حاجة ف حياتك بسهولة وفيها إنك تبقى ماشي ف الشارع ومضايق وتلاقي طفل صغير بيضحك لك ويغمز لك بعينه فتلاقي نفسك بتضحك، فيها إنك لاقي تاكل وتشرب وتنام، فيها الست الغلبانة اللي تديها جنيه وتلاقي صف دعوات ملوش حل بتبقى نفسك تديها اللي ف جيبك كله وهتمشي وانت مبسوط.
فيها حاجات حلوة كتير أوي اده اده اده لاء هي وحشه دي كلها مشاكل مع أهلك اللي انت شايف إنهم مش فاهمينك دي فيها ناس بتبان بريئة وتخدعك مظاهرهم دي فيها مذاكرة بقى وخنقة، والكلب اللي على أول شارعكوا اللي بتخاف تعدي منه لا يجري وراك.
فيها يومك اللي يبتدي بالزبالة اللي أول ما بتنزل الشارع بتشوفها، دي فيها شويه البرد اللي بيجولك وتفضل قاعد ف السرير وتحسس نفسك إنك خلاص بتموت دي فيها حاجات وحشه كتييير أوي.
م الآخر كدة الحياة دي باكيدج لازم تاخدوا كله على بعضه بالحاجات الحلوة اللي فيه والوحشة بردو الحلو أهو كويس إنه عاجبك والوحش لازم تتعامل ومعاه ولازم يعجبك قالوها زمان "لو جالك الغصب اعمله بجميلة" وخد بالك الحياة مينفعش أبدًا تعيش فيها بمبدأ أنا بيا أو من غيري الحياة ماشية لأ الحياة مش هتمشي من غيرك ولازم تبقى دي فكرتك عنها الحياة وحشة بس انت اللي بتحليها.