م الآخر| مسرح العرايس
كنت قاعد معايا، أنا وهو اللي جوايا، وبنتناقش كالعادة ونفكر هنعمل إيه في حياتنا، ونتطرق إلى أمور كتيرة جدًا، لقيتني بسألني وبقولي: عارف مسرح العرايس؟ هو: طبعًا عارفه
أنا: تعرف وجهه الشبه بينا وبينه؟
هو: إنت هتشتغلني ياعم ما تفكك مني وركز في امتحاناتك بقى كفاية سياسة
أنا: يا عم اصبر بس، دا موضوع مهم خليني احكيلك للآخر هتفهمني
هو: قول يا عم.. يارب نخلص
لو افتكرت معايا فترة مبارك، كنا ناقص نبوس على إيد الناس عشان تفهم حقيقة دولة مبارك، مع إنك لما كنت تتناقش مع أي مواطن كنت تتأكد إنه فعلًا عارف، مش محتاج حد يعرفه وحاسس بمواجع وهموم البلد، ومش محتاج حد يفكره كل شوية،
بس كان خايف يتحرك لكذا سبب، أولهم الدولة القمعية، وتانيهم الاستقرار!.
هو: تااااااااني هتقولي استقرار
أنا: يا عم استنى أنا مش بتريق فعلًا والله، الناس ارتبط في تفكيرهم إن المظاهرات تخريب وعدم استقرار، الناس دي ماشفتش أيام ناصر والسادات ومبارك أي مظاهرات، إلا وكانت بتنم عن عدم استقرار في الدولة، الناس دي اتنفخت من 3 أنظمة حطموا أي طموح وأي آمال في حياتهم.
طب فكك من الفترة دي، افتكر معايا كدا الـ18 يوم لما بدأت الناس تنزل واحدة واحدة، وأي حد كبير كان بيعدي ع الميدان بيقولنا ربنا معاكوا وشدوا حيلكوا، إنتوا الأمل وإنتوا اللي هتعملوا اللي فشلنا فيه، ساعتها كانت الناس دي مصدر أمل لينا، وفخر إنهم ربونا على الحرية.. فاكر لما مبارك مشى كلنا فرحنا، وهما كمان فرحوا معانا جدًا، لأنهم حسوا بسقوط الطاغية اللي اتظلموا منه أكتر ما إحنا اتظلمنا منه.. فرحوا جدًا بالمجلس العسكري، وكرهونا جدًا لأننا عارضنا المجلس العسكري.[FirstQuote]
هو: تفتكر إيه السبب؟
أنا: مفيش سبب غير حب الناس دي للمؤسسة العسكرية وإنهم شايفين فيها الامل الوحيد، دا غير قيادات الثورة والرموز اللي خذلتنا وخذلتهم، دا غير فشلنا إحنا كمان وعدم توحدنا على هدف واحد، دا غير إنهم شايفينا مش مقدرين حجم المخاطر على البلد،
ولما كنت تسألهم طب إنتوا عاجبكوا الشباب اللي مات على إيد المجلس العسكري، يقولك لا طبعًا بس الجيش خط أحمر.
أنا: فكرت تعرف هما ليه دايمًا يقولوا الجيش خط أحمر؟
هو: معروفة يعنى مش محتاجة فتي كتير، الناس دي شافت حروب وعرفت يعنى إيه حرب، وعرفت يعني إيه جيش يتهزم في 67 ويعنى إيه انتصار في 73.. تفتكر إحنا ليه منزلناش للناس دي؟
أنا: اعتقد ظروف البلد، بالإضافة إلى إننا مكناش مؤهلين لقيادة الشارع أو حتى التأثير فيه، دا غير قيادتنا اللي فشلت وفشلتنا معاها، دا غير عدم وضوح رؤيتنا للشارع، وإننا خذلنا الشارع جدًا.. وكمان مفكرناش ننخرط مع الناس دي بتفكيرهم، وأصرينا نفرض تفكيرنا عليهم، وعاوزينهم يمشوا معانا وخلاص، وإحنا وبس الصح ومفيش صح غيرنا.
هو: إحنا وبس اللي حبيبي!
أنا: إنت بتقلش عليا أبو رخامتك ما ترد عليا وتناقشني
هو: طب وإنت تبرر بأيه موقفهم أيام مرسي لما عرفوا إننا الصح ورجعولنا؟
أنا: هههههه هو معرفش إنك إنت الصح، هو نزل يعرفك إنه هو الصح ولا إنت.. نسيت إننا قولنالهم إن مرسي هو مرشح الثورة، وإن الثورة لازم تحكم، وإن إحنا الصح ومينفعش ينتخبوا أحمد شفيق، لإنهم بكدا بيفشلوا الثورة.. نزلوا وقت ما حسوا إن بلدهم بتضيع، وإن الجيش هينهار بسبب تصرفات مرسي، وإن البلد عايشه في أزمات مبتخلصش، وإن الثورة ضيعتنا وضيعت استقرار البلد
هو: إممممم.. ممكن برضو بس في الآخر إحنا كنا معاهم، ومفيش حد مبيغلطش، وإحنا غلطنا ومكناش نعرف الغيب يعني
أنا: لما قدرنا نشيل مرسي عن طريق انحياز المؤسسة العسكرية لينا، معتبروش إن دا نجاح لينا، بالعكس دا اعتبروه انجاز للقوات المسلحة، وعزز من موقفها عندهم، وزود الفجوة بينا وبينهم، ودخل المتسلقين على جثث الموتى، وتاجروا بـ30/6 وحطموا في ذهنهم أي تعاطف مع ثوار 25 يناير
هو: طب ما إحنا اللي حركناهم أصلًا وفهمناهم الصح، ولولا حركتنا مكنش حد اتحرك
أنا: ما هو نظرتك دي هي السبب إننا نفشل، لأنك مصمم على إنك إنت الصح، وهما اللي لازم يمشوا معانا في طريقنا لأننا أحنا الصح وبس.. طب شوفت عملوا فيك إيه في الاستفتاء الأخير؟
هو: دول شعب عبيد وجيل عمره ما هيتحرر، وإحنا اللي لازم نحركهم من تاني
أنا: هو إنت مش شايف حد إلا نفسك وتفكيرك.. يا بني افهم، الناس دي نزلت قالت نعم بكثافة وبأعداد كبيرة جدًا، لأنهم لسه بيراهنوا على المعادلة اللي إنت مبتحبهاش وهي الاستقرار والآمان، الناس دي تفكيرها متغيرش وكل مرة بيعلموك درس، إنت مصمم متتعلموش لحد النهاردة ومصمم تلومهم هما وبس، ومتلومش نفسك على خذلانك ليهم وابتعادك عنهم.
آآآآه هما اللي ضيعونا ودمروا حياتنا، بس متنساش إنهم كانوا ضحية أنظمة لعبت بيهم، وإنت لو كنت مكانهم كان هيتلعب بيك زيهم، جرب تعيش في زمانهم وشوف ردود أفعالك إيه وعيالك هيقولوا عنك إيه؟ من السهل جدًا إنك تحكم على زمن معشتوش، ومتنساش إن ممكن يجي الزمن اللي ابنك يلعنك، لأنك اتسببت في ضياع البلد.. ماهو محدش عارف الغيب!.[SecondQuote]
زي ما إنت بيعتهم وقت ما احتاجولك، داسوا عليك وعرفوك قيمتك وقت ما احتاجتهم، متلومش إلا نفسك يا كابتن، إنت اللي فاشل وطول ما إنت قاعد تنظر هتفضل فاشل، هتعيش عمرك تتكلم وغيرك بيشتغل في الشارع وع الشارع وللشارع، وإنت مكان معروف، ماوس وكيبورد وشاشة كمبيوتر وراوتر نت.. هو دا كوكبك اللي مبتعرفش تعيش غير فيه.. عرفت أنا ليه بفكرك بمسرح العرايس، ووجه الشبه بينا وبينه؟
هو: إممم.. مسرح العرايس فيه ناس بتحرك وناس مجبرة على الحركة، ناس بترسم المشهد، ومينفعش للعرايس تلعب دور غير المرسوم ليها.
أنا: ومشكلتنا بقى إننا شايفين الشعب دا عرايس، من حقنا نحركهم ونرسملهم المشهد على مزاجنا، ومينفعش يخالفوه
هو: سبني بقى أشوف امتحاناتي، وفكك منى الاستفتاء طلع أهو والنسبه كويسة، وربنا بيصلح الأمور، ورينا شطارتك بقى في الاستحقاقات اللي جاية.