عقدة الخواجة.. المدارس مصرية والمناهج إيطالية وفرنسية.. وصاحبة «مركز خياطة»: بنواكب العصر
مدرسة أزياء تعلم طالباتها وفق مناهج أجنبية
«نفسك تكون مصمم أزياء»، «بتحلمى تكونى فاشونيستا»، شعارات مختلفة ترفعها مدارس وأكاديميات ومراكز تعليم الحياكة فى مصر، التى تعتمد على مناهج عالمية فى التدريس، بهدف التنوع ومواكبة خطوط الأزياء المعاصرة. البعض منها يتبع المدارس الإيطالية فى الموضة، والبعض الآخر يحاول اتباع مناهج أخرى منها الفرنسية والأمريكية، ولكن على الرغم من ذلك، فإنها لا ترى أن هذه المناهج طمست الهوية المصرية.
«مصمم الأزياء هو اللى بإيده يحافظ على الهوية أو يمحوها مش المنهج أو المدرسة المتبعة»، كلمات نسرين ناجى، مسئول مركز لتعلم أسرار الحياكة بالمعادى، بنبرة ثقة تنم عن خبرة 20 عاماً من العمل فى المجال: «إحنا بنعتمد على مناهج التعليم العالمية مفيش عليها أى اختلاف، عشان نقدر نواكب العصر اللى بنعيش فيه، ما ينفعش أقص الباترون بشكل تفصيلة سبعيناتى فى الألفية، وده مش معناه إنى بمحو الهوية لكن ممكن نعمل دمج بين الاتنين»، ينقسم الطلاب داخل الأكاديمية إلى قسمين، الأول تتراوح أعماره بين 11 و16 عاماً، والقسم الثانى فوق 30 عاماً: «الإقبال على الكورسات كبير جداً، الناس عندها شغف إنها تتعلم وتبدع، الدراسة فى الأكاديمية بتنقسم لمستويين، الأول خاص بتعلم كيفية رسم التصميم وخطواته ومراحله، أما الثانى فهو مرحلة متقدمة خاصة بتعلم مراحل عمل الباترون وطريقة أخذ المقاسات وتنفيذه على الورق، كل مرحلة من دول بتكون 6 حصص مدة كل واحدة منهم ساعتان»، وبحسب «نسرين» فإن الطالب فى نهاية الكورس يصمم مشروعاً من صنع يده: «بيكون فيه مشروع تفصيل فى النهاية عشان نتأكد من مهارات الطالب»، عملها بمركز التصميمات والموضة الإيطالية لسنوات طويلة، جعلها قادرة على انتهاج هذا المجال فى التدريس بعالم الأزياء والموضة، شيرين حشمت، مسئولة عن أكاديمية «أرت سكوير»، التى تساعد الشباب على إيجاد الطرق المناسبة لافتتاح مشروعهم الخاص بعالم الأزياء، وليست الدراسة فيها قاصرة على ما يخص الموضة فقط: «اللى بيلتحق معانا فى الكورسات أو الدبلومات، بنعلمه إزاى يلاقى مشروع مناسب ليه مش مجرد دراسة نظرية فقط لرسم التصميمات وقص الباترون وأخذ المقاسات، بنعلمهم إزاى يقدروا يحققوا البراند الخاص بيهم، ويكون مصمم له اسم»، وتنقسم الدراسة داخل الأكاديمية بين الكورسات والدبلومات الخاصة بدراسة كافة خبايا عالم الأزياء: «الكورسات مدتها شهران 12 حصة، لكن الدبلومات بتتراوح مدتها بين 6 و8 شهور»، وتتراوح الأسعار بين 3 و10 آلاف جنيه: «مجال الموضة والأزياء مش سهل إن حد يقدر يستمر فيه من غير ما يصقل موهبته بالدراسة».
«نسرين»: نساير الموضة بالمناهج الأجنبية.. و«شيرين»: الدراسة مش نظرى إحنا بنعلم الطلاب إزاى يفتحوا مشروعهم الخاص
«بنعلمهم إزاى يبدعوا فى التصميم مش مجرد تقليد أعمى بدون فكرة جديدة»، كلمات عمرو المغربى، مسئول عن أحد المراكز لتعلم التفصيل بالإسكندرية، الذى يعتمد على أساليب متنوعة فى التعلم: «بنعلمهم إزاى يقصوا الباترون، أصول الخياطة والغرز المختلفة، إزاى يعرف ياخد المقاسات بشكل صحيح، كل مصمم بيكون تفكيره مايل أكتر ناحية استايل معين بيحبه»، وبحسب «عمرو» فإن المجال جذب الشباب خلال الفترة الماضية: «فيه أولاد كتير بقى حلمهم إنهم يتعلموا ويكونوا مصممين أزياء محترفين مبقاش حلم مقتصر على البنات بس».
1700 جنيه هى تكلفة الكورس داخل المكان: «الكورس بيكون 4 شهور كل مستوى بياخد نحو الشهر ونص بموجب محاضرتين أسبوعياً مدة الواحدة منها 3 ساعات»، ويزداد الإقبال على الكورسات خلال فترة الصيف بشكل أكبر: «ده بيكون موسم بالنسبة لنا لأنه فترة أجازات الكل بيكون فاضى وبيقدر إنه ينمى مهاراته».