معرض فى اليوم العالمى للمرأة: «أنا النص الحلو»
احتفالاً باليوم العالمى للمرأة الذى يوافق 8 مارس من كل عام، قررت مجموعة من الفنانات المصريات إقامة أول معرض كاريكاتير بعنوان «النص الحلو» فى ساقية الصاوى، يضم أفكار وأحلام وتطلعات المرأة المصرية.
«فكرنا نحتفل بالمرأة المصرية بشكل جديد، فقلنا نقدم معرضاً يضم رسوم كاريكاتير يوضح مشاكل ومعاناة المرأة المصرية».. حسب عبير إبراهيم وارث، إحدى المشاركات فى المعرض، مؤكدة أنها تعشق الرسم منذ طفولتها: «طلعت كل موهبتى اللى من أيام ابتدائى وعشقى لرسم الكاريكاتير فى لوحة المعرض اللى هاشارك بيها، ومن خلالها حاولت أوضح للناس إن المرأة المصرية مفيش زيها، البنت دلوقتى بقت كل حاجة فى المجتمع ومفيش حد هيقدر يهمش دورها الواضح فى أى شىء، وهو ده الهدف من رسوماتنا». اختارت الفنانات المشاركات فى المعرض اسم «النص الحلو» لعدة أسباب: «إحنا أول مرة نشارك فى معرض والناس تشوف رسوماتنا، وأول مرة نحتفل باليوم العالمى للمرأة، عشان كده فكرنا نختار اسم جديد للمعرض زى فكرة الاحتفال»، وأضافت «عبير»: «فى الأول اقترحنا اسم ستات وبس، وبعدين استقرينا على النص الحلو كدليل على أن المرأة هى مشاركة بالنص مع الرجل فى كل حاجة، أما الحلو فاخترناه عشان هى الجزء اللى دائماً حلو فى المجتمع». الفتاة العشرينية وزميلاتها فى المعرض يتوقعن أن يكون عام 2014 هو الأفضل بالنسبة للمرأة: «اللى جاى هيكون أحسن للمرأة ولكل حاجة فى البلد، وعشان كده تعالوا احتفلوا معانا باليوم العالمى للمرأة».