إيمان الحصري لجمهور DMC في عيدها الـ3: يا رب نكون قدمنا إعلام قريب منكم
الإعلامية: طول الوقت بنحاول ندور على محتوى مختلف
إيمان الحصري
احتفل نجوم شبكة قنوات "dmc" بمرور 3 سنوات على إطلاقها، عبر بث مباشر على الهواء، تحدثوا خلاله عن أمنياتهم في العام الجديد، مع فقرات جديدة يجرى تجهيزها في برامجهم المختلفة.
وقالت المذيعة إيمان الحصري لـ"الوطن": "بقول لكل جمهور قناة DMC كل سنة وهما طيبين، ويا رب نكون قدرنا خلال الـ3 سنين دول نقدم شيء قريب منهم ونحافظ على علاقتنا الجيدة بالجمهور".
وعن برنامج "مساء DMC" قالت "إيمان": "طول الوقت بنحاول ندور على حاجة مختلفة في البرنامج، والحقيقة إن الاختلاف دايما بييجي من عند الناس واللي بيحصل في الشارع هو اللي بيفرض علينا الاختلاف ده، يمكن في 2019 كنا بنعمل حلقات خارجية قليلة لكن في 2020 ناويين ننزل خارجي تاني، إن شاء الله بداية من الشهر الجاي هيكون في حلقات خارجي على الأقل حلقة كبيرة علشان نكون قريبين من الناس وده دايما بنعمله من الاستديو بنعرض مشاكل فنحن صلة الوصل بين المواطنين والحكومة".
وأضافت "إيمان": "الحمد لله إحنا عندنا فقرة في مساء dmc اسمها "الرحمة" بنركز دايما على أي حاجة ليها علاقة بالرحمة أي عمل ممكن تعمله يكون في رحمة لأنها ممكن تكون مع إنسان أو حيوان أو شخص كبير أو صغير حتى مع نبات، أي حاجة فيها مفهوم الرحمة بننزل ونصور مع الناس ونطلعهم نجوم وبيبقوا أبطال الحلقة سواء كان البطل ده ضيف في الاستديو أو تقرير وأعلى نسبة مشاهدة في تقارير البرنامج بتكون التقارير اللي من النوع ده وده يدل على أن المشاهدين مهتمين بتلك الموضوعات وأعتقد ده بيعمل تأثير كويس".
وعن طموحاتها القادمة قالت الإعلامية إيمان الحصري أنها تتمنى الحفاظ على ثقة الناس ببرنامج مساء dmc وبإذن الله نجتهد أكتر الفترة المقبلة للحفاظ على تلك الثقة".