«السيسى» بالحجم الطبيعى على كوبرى أكتوبر.. ومحافظة الجيزة: «التصريح لا ينفى الضرر»
3 بانرات ضخمة على كوبرى أكتوبر، تنضم لطابور لافتات الدعاية للمرشح المحتمل المشير عبدالفتاح السيسى، صورة للمشير السيسى بزيه المدنى، يذيلها اسم ورقم تليفون صاحبها الحاج «محمد البطاح»، تاجر قطع غيار السيارات ومتعهد «لافتة البرواز الشهيرة».
«صورة البرواز»، هكذا عرفها الناس فى ميادين المحروسة وشوارعها، وأخيراً كوبرى أكتوبر، اللافتة التى ترتفع لأكثر من مترين، وبعرض 3 أمتار محمولة على أعمدة خشبية يعتبرها البطاح «هدية بسيطة» يقدمها «للراجل اللى مصر كلها بتحبه»، انتشارها فى الميادين كان مبرراً، لكن وجودها بهذه الأبعاد فوق أرصفة كوبرى أكتوبر أثار دهشة أصحاب السيارات الذين توقفوا لالتقاط الصور إلى جوارها، لتثير خوفهم أيضاً، فاللافتة العملاقة تستند إلى 3 أعمدة خشبية مربوطة بسور الكوبرى، ما يمكن أن يتسبب فى كارثة إذا ما سقطت فى أى وقت.
«مش أنا اللى باختار الأماكن اللى بنعلق فيها البانرات ده بتاع الدعاية هو اللى بيقرر»، يرى «البطاح» أن البانر فى موضعه لا يؤذى أحداً، ولا يعيق الطريق «مش عايز حد يتضايق من اللافتة، ورقم تليفونى حطيته عشان كده ومن شوية حد كلمنى عشان الصورة اللى على مدخل الزمالك وقعت بعت حد يعدلها». لافتات كوبرى أكتوبر لم تكن هى الوحيدة التى وضعها الحاج محمد، ولكنه صاحب 60 لافتة، ملأت شوارع القاهرة وزاد الطلب عليها، حتى وصلت المحافظات «الناس بتتصل بيا بيقولولى عايزين صورة فى ميدان كذا أو شارع كذا وأنا ببعتها على حسابى تكلفة ونقل ومش طالب حاجة ولا أنا تبع حد، ويفط الكوبرى لو حد طلب منى أشيلها هشيلها أنا بعمل حاجة أفرح الناس بيها مش أضايقهم». التصريح المطلوب لتعليق لافتات الدعاية، يؤكد «البطاح» حرصه الشديد على وجوده معه قبل وضع اللافتة.