النهارده بصراحة عايزة أتكلم فى موضوع الكهربا.. طبعاً عندنا أزمة كهربا والأزمة دى نتيجة حاجات كتير.. أهمها إننا ماعندناش فلوس وإن بقالنا ٣ سنين المحطات مش بيتعملها صيانة محترمة «الحقيقة كل حاجة فى البلد بقالها ٣ سنين محتاجة صيانة حتى الناس».. كمان بقالنا ٣ سنين مفيش محطات جديدة اتعملت «وحتى لو كانوا بدأوا يعملوا محطات من ٣ سنين فهى مش هتدخل الخدمة إلا بعد خمس سنين».
فى جانب تانى عايزة أتكلم فيه وهو ثقافتنا إحنا كشعب فى التعامل مع الكهربا.. إحنا عادى جداً واحد يبقى قاعد فى البيت لوحده وكل الأنوار مفتوحة.. عادى صيف شتا تلاقى السخانات شغالة طول اليوم.. عادى تكسل تعمل شاى ع البوتاجاز وتشغل الكاتيل.. وطبعاً ده بيزود الأحمال.. هييجى حد ينطلى فى الكلام ويقول لى أساساً كهربة البيوت مش بتمثل حمل كبير على استهلاك الدولة للكهربا.. ما هو كلامك صح بس فى الآخر هى حمل.. وبعدين انتوا ناس غريبة ما هو حضرتك لما تتعلم توفر وترشد فى استهلاك الكهربا فى الآخر فاتورتك هتيجى أقل يعنى هتفيد وتستفيد.
والناس اللى بتسرق كهربا علشان تنور كشك فى الشارع.. أو اطلع على الدائرى مثلاً وشوف الأكشاك اللى جنب أعمدة النور كلها سارقة كهربا.. المبانى اللى طلعت بدون تراخيص كلها سارقة كهربا.. المحلات اللى بتسرق كهربا علشان تنور اليفط بتاعتها.. ومحدش يستهون بالحاجات دى لأنها حمل على استهلاك الكهربا.
السادة أصحاب الآوت دور.. نور آوت دور حضرتك غطى ع الكهربا.. أنا عايزة أفهم إيه الحكمة إن الآوت دور يفضل شغال لبعد الساعة ١٠.. ليه ما يتعملش حاجة زى «تايمر» يخلى الآوت دور يفصل بعد الساعة ١٠.. وإيه الحكمة إن أصحاب الآوت دور الفاضية ومعليهاش إعلان يسيبوها منورة ليه؟؟؟!!! هاه ليه؟؟!!.. الناس دى وموظفين الحى اللى سامحين بكده المفروض يتحقق معاهم بتهمة إهدار وسرقة المال العام.
وبعدين حضرتك عايز تنور الآوت دور ما تحط خلايا طاقة شمسية ما كله فى الآخر على حساب صاحب المحل والتكلفة هتتحمل على العميل.. لكن مش منطقى إنك تاخد كهربا مدعمة من الدولة علشان تفضل منور الآوت دور حتى وهو فاضى علشان تعرف الناس إن فيه آوت دور هنا!!
والحكومة بتطالب الناس بترشيد الاستهلاك طب ما ترشدوا انتوا الأول.. غيروا كل الإنارة بلمبات موفرة فى المؤسسات الحكومية.. الحكومة لازم يكون ليها دور أقوى وفعال أكتر علشان تفهم المواطن يعنى إيه سياسة ترشيد استهلاك الكهربا.. لازم يكون فيه حملات فى التليفزيون وفى الجرايد وفى المدارس تشرح للناس أهمية توفير استهلاك الكهربا.. تفهمهم إن ده فى مصلحتهم حتى لو إحنا ماعندناش أزمة لأن توفيرك للاستهلاك هيخلى فاتورتك تبقى قليلة ودى مصلحة ليك زى ما هى مصلحة للبلد.. لازم يبقى فيه خط ساخن فى وزارة الكهربا نقدر نبلغ بيه عن اللى بيسرق كهربا لأنه بيسرق حقى وحقك ودى تهمة سرقة للمال العام لازم يتحاسب عليها.
أى فكرة تساعدك فى إنك توفر استهلاك للكهربا هى مصلحة ليك وليا وللبلد.. وكفاية نورك غطى ع الكهربا.