صاحب فكرة إنشاء حديقة لذوي الاحتياجات الخاصة: هدفي خدمة الإنسانية
خالد مصطفى صاحب فكرة إنشاء أول حديقة لذوي الاحتياجات الخاصة في الشرق الأوسط
قال خالد مصطفى، صاحب فكرة إنشاء أول حديقة لذوي الاحتياجات الخاصة في الشرق الأوسط، إنّ فكرة إنشاء حديقة لـ ذوي الاحتياجات الخاصة لها واقعة طريفة، متابعا: «الموضوع جه صدفة، وبعتبره من الأقدار الجميلة إن الواحد يحقق حلم لحد بالشكل ده».
الفكرة كانت من طفل كنت بلعب معاه شطرنج
وأضاف مصطفى، خلال مداخلة عبر تطبيق «زووم»، مع الإعلامي محمد الشاذلي، المذاع على فضائية القناة الأولى: «كنت في وقت بلعب شطرنج مع طفل من ذوي الاحتياجات وهو قاعد على كرسي متحرك، وكان سنة في حدود 10 سنوات، والكلام ده كان من سنة تقريبا، وكان والديه قاعدين معاه، والحديث والحوار اللي دار بينا أثناء اللعب إني بقوله سعادتك أكيد بتلاقي السعادة في الشطرنج، قالي لا يا أنكل أنا بصراحة بحب وشاور على المكان اللي فيه المراجيح بس مش عارف، ومش لاقي غير الشطرنج والألعاب الإلكترونية بس اللي أقدر ألعبهم».
كلمة الطفل لمست وجداني وقررت أساعد ذوي الاحتياجات الخاصة
وتابع: «الكلمة دخلت عندي كده بطريقة مختلفة مش زي ما بيقولوا من الودن دي وطلعت من الودن الثانية، لكن دي دخلت ولمست الوجدان واستقرت وقعدت أفكر نعمل إيه لطفل زي ده والأطفال اللي زيه كلهم، عشان نوجد ليهم الرفاهية اللي هيّ من حقهم، لأن من حقهم يلعبوا ويفرحوا وحاجات كتير، فكانت البداية إني أفكر ازاي أنفذ حاجة زي كده».
عرضت فكرتي لخدمة المجتمع والإنسانية
وأوضح: «بعد انتهاء جلوسي مع الطفل وكان اسمه (أدهم)، وبعد البحث والتفكير إنّه مفيش في مصر ألعاب ليهم، ولكن الموضوع مرضتش يكون مغلق، وبما إني كنت رئيس نادي روتاري إسكندرية رمل العام الماضي، بنبقى نعرض مشروعتنا اللي عاوزين نعملها لصالح الإنسانية وخدمة المجتمع، وأخدت على عاتقي إن ده مشروع رئيسي أساسي وحلم من الأحلام عاوز أحققه».
وأكد: «الفكرة جت من الطفل أدهم ومن أحلامه، في إنه يمارس حياته الترفيهية اللي بيمارسها أي طفل، وأقل حاجة بيفرح بيها الطفل هي المرجيحة، فكرنا وبعد كده أحد أصدقائي رئيس لجنة المشروعات في النادي اللواء صلاح عيد، تحمس جدا وأخد على عاتقه فكرة تصنيع وتنفيذ القطع والألعاب الموجودة في الحديقة هنا في مصر، وده أول تنفيذ لها هنا في مصر».